“Fənərbaxça”nın baş məşqçisi, portuqal mütəxəssis Joze Mourinyo məşqçilik karyerasında peşman olduğu məqam haqda söhbət açıb.
Arena.az “Corriere dello Sport” nəşrinə istinadən məlumat verir ki, “Mour” bu məqamın “Real”ın baş məşqçisi vəzifəsindən ayrılması olduğunu bildirib və buna peşman olduğunu etiraf edib:
“Oyunlardan danışsaq, belələri çoxdur, çünki məğlub olanda həmişə düşünürsən ki, başqa cür də edə bilərdin, mən isə çox oyunlarda məğlub olmuşam.
Peşəkar seçimdən danışsaq, mənim Florentinoya (Florentino Peres, “Real”ın prezidenti – redaktorun qeydi) dediyim “yox”um. O, mənə demişdi: “Mou”, indi getmə, sən çətin hissəni bitirdin, indi isə yaxşı hissə gəlir…”. Bunun baş verəcəyini bilirdim, amma İspaniyada üç çətin ildən sonra “Çelsi”yə qayıtmaq istədim. Həm də mən dərhal (Avropa Liqasının finalında məğlub olduqdan sonra) “Roma”dan ayrılmalıydım, amma getmədim və yanıldım”, deyə “Mour” bildirib.
Xatırladaq ki, Joze Mourinyo 2010-2013-cü illərdə “Real”ı çalışdırıb.
61 yaşlı Joze Mourinyo cari ilin iyul ayında “Fənərbaxça”nın sükanı arxasına keçib. Portuqal mütəxəssis İstanbul klubu ilə müddəti 2026-ci ilin iyun ayının sonuna qədər qüvvədə olacaq müqavilə imzalayıb. “Fənər” “Mour”un qarşısında nə az, nə çox – klubun iddialarını gerçəkləşdirmək tapşırığını qoyub.
Bu müddətdə portuqal mütəxəssis “Fənərbaxça”nı 26 oyuna çıxarıb, 16 qələbə, 6 heç-heçə, 5 məğlubiyət yaşayıb. “Fənər”in top fərqi isə 55:31 nisbətindədir.
Hazırda “Mour”un “Fənər”i Türkiyə Super Liqasının yarış cədəvlində 16 oyundan 36 xalla 2-ci pillədə qərarlaşıb. “Fənərbxça” 44 xal toplamış lider “Qalatasaray”dan geri qalsa da, “Mour” çempionluq iddiasını sürdürür.
Joze Mourinyo “Fənərbaxça”dan öncə İtaliyada “Roma”nı çalışdırıb. Portuqal mütəxəssis karyerası ərzində “Benfika”, “Unian Leyriya”, “Portu”, “Çelsi”, “İnter”, “Real”, “Mançester Yunayted” və “Tottenhem”i çalışdırıb. “Mour” sükanı arxasında olduğu komandalarla həmişə uğura nail olmağı bacarıb. Portuqal mütəxəssisin çalışdırdığı kollektivləri səciyyələndirən cəhət, hətta qənimət qazanmasalar belə, oyun keyfiyyəti baxımından tərəqqiyə nail olmaqları olub ki, bu da Joze Mourinyonun futbol dünyasının ən nüfuzlu mütəxəssislərindən biri olaraq qəbul edilməsini şərtləndirir.
