Xaricdə təhsil fırıldağı: "Global STM" və "Aksaray" vətəndaşlardan pul toplayıb saxta qəbul sənədi verdi — İDDİA

Azərbaycanda fəaliyyət göstərən xaricdə təhsillə bağlı şirkətin vətəndaşları aldatdığı iddia olunub.

Yenicag.az-a daxil olan məlumata əsasən, “Global STM” və “Aksaray” Xaricdə Təhsil şirkətlərinin çoxsaylı fırıldaqçılıqla məşğul olduğu bildirilir.

Qeyd olunur ki, sözügedən şirkətlərin sahibi Təbriz Zakir oğlu Əliyev xaricdə təhsil arzusunda olan çox sayda insanın fərdi məlumatlarının əks olunduğu sənədlər toplayıb. Həmin vətəndaşlardan pul da alan Təbriz Əliyev onları universitetlərə qəbul etdirəcəyi ilə bağlı vədlər verib. Xüsusilə Türkiyənin Qarabük Universitetindən saxta qəbul sənədləri əldə edərək onları aldadıb.

Bununla da yetinməyən Əliyev bir çox zərərçəkənin pasport və digər mühüm sənədlərini itirib. Gənclərin gələcəklə bağlı xəyallarını da darmadağın etdiyi bildirilən Əliyevdən şikayətçi olan vətəndaşlar pullarının və sənədlərinin qaytarılmasını, bu cür halların təkrarlanmaması üçün hüquqi tədbirlərin görülməsini tələb edirlər.

İddialarla bağlı qarşı tərəfin də mövqeyini dərc etməyə hazırıq.