“Əl-Hilal”ın braziliyalı ulduz hücumçusu Neymar maraqlı və iddialı açıqlaması ilə futbol dünyasının diqqətini çəkib.
Arena.az CNN-ə istinadən məlumat verir ki, “Ney” bir vaxtlar “Barselona”da birlikdə çıxış etmiş, argentinalı ulduz hücumçu Lionel Messi, uruqvaylı ulduz hücumçu Luis Suares və özünün də daxil olduğu əfsanəvi MSN üçlüyünü yenidən canlandırmağın maraqlı olacağını dilə gətirib:
“Aydındır ki, yenidən “Leo” (Messi) və Luis (Suares) ilə oynamaq əla olardı. Onlar mənim dostlarımdır. Biz hələ də əlaqə saxlayırıq. “Barselona” dövrünün üçlüyünü dirçəltmək maraqlı olardı.
Mən “Əl-Hilal”da da, Səudiyyə Ərəbistanında da xoşbəxtəm, amma kim bilir. Futbol gözlənilməzliklərlə doludur. Səudiyyə Ərəbistanında mənə təklif edilmiş layihə təkcə mənim üçün deyil, həm də ailəm üçün çox yaxşı idi, ona görə də bu ölkəyə getmək ən yaxşı seçim idi”, deyə “Ney” vurğulayıb.
Xatırladaq ki, MSN – Messi, Suares və Neymar üçlüyü 2014-2017-ci illərdə “Barselona”da birgə çıxış edib.
Neymar “Santos”un məzunudur. “Ney” 2009-2013-cü illərdə “balıqlar”ın əsas komandasında çıxış edib. Bu müddət ərzində Neymar “Santos”un heyətində 225 oyuna çıxıb, 136 qol və 64 məhsuldar ötürmə ilə fərqlənib.
Neymar 2013-2017-ci illər aralığında “Barselona”da çıxış edib və “blauqrana”nı öz istəyi ilə tərk edərək, PSJ-yə keçib. Bu, hələ də futbol tarixini ən bahalı keçidi olaraq qalmaqdadır – 222 milyon avro məbləğində əməliyyat.
“Ney” “blauqrana”nın heyətində 186 oyuna çıxıb, 105 qol vurub, 76 məhsuldar ötürmə verib. Braziliyalı ulduz “Barselona” ilə İspaniya La Liqasının (2 dəfə), İspaniya Kubokunun (3 dəfə), İspaniya Super Kubokunun, UEFA Çempionlar Liqasının, UEFA Super Kubokunun, FIFA Klub Dünya Kubokunun qalibi olub.
Avropada debütü “Barselona” ilə başlamış Neymar PSJ-də də 6 il keçirdikdən sonra 2023-cü ilin yayında “Əl-Hilal”a keçib. Tərəflər arasında sonradan 1 il uzadılmaq imkanını özündə ehtiva edən, müddəti 2025-ci ilin iyun ayının sonuna qədər nəzərdə tutulmuş müqavilə imzalanıb. Transfer ərəblərə 90 milyon avro məbləğə başa gəlib.
Təcrübəli hücumçu “Əl-Hilal”ın heyətində bütün yarışlarda cəmi 7 oyuna çıxıb, 1 qol vurub, 3 məhsuldar ötürmə verib.
Neymar 2010-cu ilin avqustunda debüt etdiyi Braziliya yığmasının heyətində 128 oyun keçirib, 79 qol vurub, 58 məhsuldar ötürmə verib.
“Transfermarkt” internet-portalı 32 yaşlı braziliyalı hücumçunun transfer dəyərini 15 milyon avro məbləğində qiymətləndirir.
