Məlum olduğu kimi, “Real”ın braziliyalı ulduz hücumçusu Vinisius Junior Səudiyyə Ərəbistanı klublarının transfer hədəfidir.
Arena.az AS dərgisinə istinadən məlumat verir ki, Səudiyyə Ərəbistanı Peşəkar Liqasının baş direktoru Ömər Muğarbel, yerli çempionatın klublarının Vinisius Junioru satın almaq niyyətində olması ilə bağlı mətbuatda yayılmış bu xəbərlərə münasibətini açıqlayıb:
“Səudiyyə Ərəbistanı çempionatında müxtəlif səviyyələrdə müxtəlif yetkinlik dərəcələrinə malik klublar var. Bu, dünyanın bütün liqalarında baş verir. Belə oyunçuları cəlb etməyə qadir komandalar var, elələri də var ki, hələ bu səviyyəyə çatmayıblar. Bu günü dəyərləndirsək, klublarımız belə istedadı (Vinisius Junior kimi – redaktorun qeydi) cəlb etmək və inkişaf etdirmək üçün gərəkli hər xüsusa malikdirlər, ona görə də gəlin, gözləyək və nə baş verəcəyini görək”, deyə Muğarbel bildirib.
Vinisius Junior “Flamenqo”nun yetirməsidir. Braziliyalı cinah hücumçusu “Real”a 2018-ci ilin iyul ayında 45 milyon avro məbləğ müqabilində elə, “Flamenqo”dan keçib.
Vinisiusun İspaniya nəhəngi ilə müqaviləsinin müddəti 2027-ci ilin iyun ayının sonuna qədər qüvvədədir.
Cari mövsümdə “Vini” madridlilərin heyətində 23 oyuna çıxıb, 13 qol və 9 məhsuldar ötürmə ilə fərqlənib.
Vinisiusun “Real”da çıxışının ümumi mənzərəsi 288 oyun, 97 qol, və 83 məhsuldar ötürmədən ibarətdir.
“Vini” “qaymaqlılar”la İspaniya La Liqasının (2019/2020, 2021/2022, 2023/2024), İspaniya Kral Kubokunun (2022/2023), İspaniya Super Kubokunun (2019/2020, 2021/2022, 2023/2024), Çempionlar Liqasının (2021/2022, 2023/2024), UEFA Super Kubokunun (2022/2023, 2024/2025), FIFA Klub Dünya Kubokunun (2019, 2023), FIFA Qitələrarası Kubokun (2024) qalibi olub.
Vinisius Junior 2019-cu ilin sentyabrında debüt etdiyi Braziliya milli komandasının heyətində 37 oyun keçirib, 5 qol vurub və 5 məhsuldar ötürmə verib. Vinisius Braziliyanın U-15, U-17 komandaları ilə Cənubiamerikan Çempionatının qalibi olub.
“Transfermarkt” 24 yaşlı braziliyalı vingerin transfer dəyərini 200 milyon avro məbləğində qiymətləndirir. Bu məbləğ “Vini”nin dünyanın ən bahalı iki futbolçusundan biri olması deməkdir.
