"Microsoft" şirkətinin təsisçisi süni intellektlə bağlı maraqlı proqnozlar verib və onun insanı əvəz edə bilməyəcəyi sahələri açıqlayıb
Gələcəkdə süni intellekt həyatımızı inanılmaz dərəcədə dəyişəcək: bir çox peşə lazımsız hala düşəcək və insanlar həftədə cəmi bir neçə gün işləyəcək.
Moderator.az xəbər verir ki, bu barədə "TomsGuide" saytı yazıb. Məlumatı "hi-tech.mail.ru" nəşri yayıb.
Məlumatda deyilir ki, əgər texnologiyaları izləyirsinizsə, yəqin ki, süni intellektin hər sahəyə sürətlə tətbiq edildiyini görmüsünüz. Bir çoxları bunun iş yerlərinin azalmasına səbəb olacağından narahatdır.
Son vaxtlar süni intellekt hər yerdə qarşımıza çıxır və sanki artıq innovasiya deyil, həddindən artıq təbliğ edilən bir marketinq terminidir. Bununla belə, müxtəlif sahələrdə çalışan insanlar bu texnologiyaların insanı əvəz edə biləcəyindən ciddi şəkildə narahatdır. "Microsoft" şirkətinin həmtəsisçisi Bill Qeyts də hesab edir ki, bu ehtimal kifayət qədər realdır.
Bill Qeytsin gələcəkdə iş dünyasının necə dəyişəcəyinə dair proqnozları böyük maraq doğurub. O, yaxınlarda "The Tonight Show" verilişində Cimmi Fellonun qonağı olub və süni intellektin nə vaxtsa bir çox sahələrdə insanları əvəz edəcəyini bildirib.
O, bu texnologiyanın nəqliyyatda, yaradıcı sahələrdə, mühəndislikdə, istehsalatda və kənd təsərrüfatında dominant rol oynayacağını qeyd edib. Bununla belə, bəşəriyyət üçün hələ də vacib olan ən azı üç peşə qalacaq.
"Bəzi sahələri özümüz üçün qoruyub saxlayacağıq. Amma istehsalat, logistika və kənd təsərrüfatı ilə bağlı məsələlər zamanla tam həll olunacaq", - o, Fellona bildirib. Bəzi texnologiya liderləri yaxın gələcəkdə proqramlaşdırmanın tamamilə süni intellektin sahəsinə çevriləcəyini desə də, Bill Qeyts bunun əksini düşünür.
Onun fikrincə, süni intellektin insanı əvəz edə bilməyəcəyi ilk peşə kodlaşdırmadır. İntellekt artıq proqram yazmaqda olduqca yaxşıdır, lakin bu sahədə insan amili həlledici olaraq qalacaq. Çünki kimsə süni intellektin dərin strukturlarını başa düşməli və onun düzgün işləyib-işləmədiyini yoxlamalıdır.
O, bildirib ki, inkişafçılar (developerlər) süni intellektin daxili məntiqini anlamaq, onu yoxlamaq və səhvləri düzəltmək üçün həmişə lazım olacaq. "Bu, belə bir sual verməyə bənzəyir: Kompüterlər vurma əməliyyatını mükəmməl bacardığı halda, bizə hələ də riyaziyyat öyrənmək lazımdırmı?" - Qeyts əlavə edib.
O, vurğulayıb ki, proqramçılar səhvləri aşkarlamaq və düzəltmək, alqoritmləri təkmilləşdirmək və süni intellekti daha da inkişaf etdirmək üçün əvəzedilməz olacaq.
İkinci peşə biologiyadır. Süni intellekt artıq xəstəliklərin diaqnostikası və DNT analizində istifadə olunsa da, bioloqların araşdırmalar aparması və kəşflərə nəzarət etməsi vacibdir. Qeyts niyə məhz bu sahəni digər elmi və yaradıcı sahələrdən fərqləndirdiyini açıqlamasa da, o, bioloqların hələ uzun müddət elm dünyasında əsas fiqur olaraq qalacağını düşünür.
Üçüncü peşə enerji sahəsi üzrə mütəxəssislərdir. "Microsoft"un həmtəsisçisinə görə, enerji sektoru tam avtomatlaşdırma və süni intellektin tətbiqi üçün həddindən artıq mürəkkəbdir. Digər sahələrdə isə iş həftəsi 2-3 günə qədər azalacaq və bəlkə də daha qısa olacaq. Qeyts həmçinin hesab edir ki, süni intellekt sayəsində tibbi ekspert məsləhətləri və təhsil resursları daha əlçatan və ucuz olacaq.
