Rusiyada maaşı 100 min rubldan çox olan iş elanları son bir ildə 32 faiz artsa da, bu vəzifələr üçün rəqabət də sürətlə güclənir. Xüsusilə tikinti, sənaye, logistika və nəqliyyat sektorlarında maaşlar artarkən, işəgötürənlər həm ixtisaslı mütəxəssislərə, həm də ixtisassız işçilərə daha yüksək maaş təklif etməyə başladılar.
Hafta.az-ın yazdığına görə, lakin eyni zamanda, bu cəlbedici vəzifələr getdikcə daha aşağı maaş tələb edən immiqrant işçilər tərəfindən doldurulur. Bəzi immiqrantlar yerli əhalinin maaşından 30-60 faiz aşağı işləməyi qəbul edirlər. Xüsusilə kuryer, sürücü və qaynaqçı kimi sahələrdə sürətlə artan maaşlar bu işləri həm yerli əhali, həm də mühacirlər üçün daha cəlbedici edir.
Rusiya Daxili İşlər Nazirliyinin məlumatına görə, 2024-cü ildə ölkəyə 170 min əməkçi miqrant daxil olub. Onların əksəriyyəti Çin, Hindistan, Vyetnam və Banqladeş kimi ölkələrdən gəlib.
Beynəlxalq miqrasiya üzrə ekspert Yevgeniya Barhayevanın fikrincə, bir çox miqrantlar uzun saat və aşağı maaşla işləməyə hazırdırlar ki, bu da onları işəgötürənlər üçün cəlbedici edir.
Bildirilir ki, Hindistan və Vyetnamdan olan işçilər daha çox tekstil və istehsal sektorlarında, Çin və Şimali Koreyadan olanlar isə daha çox tikintidə çalışırlar. Barhayeva vurğulayır ki, Çin, Myanma və Türkmənistandan olan işçilərin yüksək nizam-intizamı və səmərəliliyi ilə seçilirlər.
Lakin bu dinamika təkcə iqtisadi deyil, həm də sosial nəticələr verir. Rusiya əmək bazarında tələb-təklif balansı sürətlə dəyişdikcə, indi işəgötürən deyil, işçi seçim mövqeyindədir. İmmiqrantlar aşağı maaşlara və uzun iş saatlarına baxmayaraq iş tapmağa daha çox meyllidirlər.
Məsələn, Orta Asiyalı miqrant qaynaqçı 80 min rubla işləməyə razılaşa bildiyi halda, Rusiya vətəndaşı üçün eyni işə tələb adətən 120 min rubldan başlayır. Mütəxəssislər əmək miqrantlarının xərcləri azaltmaqla, vergilər və sosial fond ayırmaları ilə büdcəyə töhfə verməklə işəgötürənlər üçün cəlbedici olduğunu deyirlər, lakin bu vəziyyətin sosial gərginliyi artıra biləcəyi barədə xəbərdarlıq edirlər.
