Futbol üzrə İtaliya yığmasının sabiq üzvü, “Cenoa”nın 34 yaşlı hücumçusu Mario Balotelli Genuya klubundakı durumundan danışıb.
Arena.az xəbər verir ki, o, komandanın fransalı baş məşqçisi Patrik Vieyranın bu kluba gəlişindən sonra, az oyun keçirməsi mənzərəsində cari vəziyyəti ilə bağlı bunları söyləyib:
“Aydınlaşdırmaq istəyirəm ki, mən tam sağlamam və tanrıya şükürlər olsun ki, heç bir fəsadım yoxdur. Keçmişdə oxşar vəziyyətlərdə olduğu kimi, gələcəkdə axmaq bir xüsus söyləniləcəyi təqdirə görə, sizə bu barədə xəbərdarlıq edirəm. Hər kəsi öpürəm, irəli, “Cenoa”!
Yeri gəlmişkən, “Cenoa”nın baş məşqçisi Patrik Vieyra da “Leççe” ilə 0:0 hesablı səfər heç-heçəsindən sonra Balotellinin oyun vaxtının azlığı ilə bağlı sualı cavablayıb:
“Mario oyunda iştirak etməmiş digər oyunçular kimi vacib oyunçudur. Ehtiyat oyunçular skamyasında başqa oyunçularımız da var. Biz vahid komandayıq və hamımız önəmliyik. Bu qərarı bu gün verdim, sabah isə dəyişə bilər. Klub və komanda – ən vacib xüsuslardır. Bunu başa düşsək, bugünkü kimi mühüm işlər görəcəyik”, deyə Vieyra fikrini əsaslandırıb.
Xatırladaq ki, Balotelli ötən il oktyabrın sonunda “Cenoa” ilə müqavilə imzalayıb. 34 yaşlı futbolçu yeni komandasına azad agent kimi keçib. Tərəflər arasındakı müqavilə bu mövsümün sonunadək (2025-ci ilin 30 iyununa qədər) nəzərdə tutulub. Mario cari mövsümdə 6 oyun keçirsə də, bu görüşlərdə məhsuldar fəaliyyəti ilə diqqət çəkməyib.
Balotellinin “Cenoa”dan əvvəlki sonuncu iş yeri Türkiyənin “Adana Dəmirspor” klubu olub. O, 2021-ci ilin iyulunda üz tutduğu Adana təmsilçisini 2022-ci ilin avqustunda İsveçrə “Sion”una dəyişmiş, 2023-cü ilin sentyabrında yenidən Türkiyə təmsilçisinə qayıtmışdı.
İtaliyalı futbolçu karyerası ərzində “İnter”, “Mançester Siti”, “Milan”, “Nitsa”, “Liverpul”, “Breşiya”, “Olimpik” (Marsel), “Montsa” və “Lumessane” kimi klubların da formasını geyinib.
Mario Balotelli 2010-cu ilin avqustunda debüt etdiyi İtaliya yığmasının heyətində 36 oyun keçirib. O, bu oyunlarda 14 qol və 5 məhsuldar ötürmə ilə yadda qalıb.
“Transfermarkt” internet-portalı 34 yaşlı hücumçunun transfer dəyərini 500 min avro məbləğində qiymətləndirir.
