Türkiyə ilə Rusiya arasında bank əməliyyatlarında çətinliklər davam edir.
Hafta.az-ın RİA-ya istinadən yazdığına görə, mənbə Türkiyə Mərkəzi Bankının (TCMB) ABŞ-ın Rusiyaya qarşı sanksiyalar siyasətində hər hansı dəyişiklik və ya istisna ilə bağlı banklara rəsmi məlumat vermədiyini bildirib.
Türkiyədəki bankların Rusiya ilə əməliyyatlar aparması üçün TCMB-dən rəsmi bildiriş tələb olunduğunu bildirən mənbə, "Bu günə qədər sanksiyalar siyasətində hər hansı dəyişikliklə bağlı heç bir bildiriş almamışıq" deyib. Trampın ABŞ-da mümkün prezidentliyi ilə bu məsələdə dəyişiklik ola biləcəyi ilə bağlı suala o, müvafiq rəsmi orqanlara müraciət edib.
Digər tərəfdən Rusiyanın Ankaradakı səfiri Aleksey Yerxov ABŞ sanksiyalarının Rusiya ilə Türkiyə arasında ticarəti çətinləşdirdiyini və bank əməliyyatlarının bloklandığını açıqlayıb. Yerxov Türkiyə banklarında Rusiya ilə ticarət edən şirkətlərə təzyiqlərin artdığını, hesabların bağlandığını və köçürmələrin bloklandığını bildirib. Problemlərin həlli üçün BRİCS sammitində iki ölkə liderləri arasında keçirilən görüşlərdən sonra müvafiq qurumların əməkdaşlıqda çalışdığı bildirilib.
“Financial Times” daha əvvəl Donald Trampın prezident seçkilərində qalib gələcəyi təqdirdə Qərbin Rusiyaya qarşı sanksiyaların ləğvini müzakirə edə biləcəyini irəli sürmüşdü. Bununla belə, türkiyəli analitik Umur Tuqay Yücel bildirir ki, Ukraynada münaqişənin həlli üçün danışıqlar başlamadan belə bir dəyişiklik mümkün deyil və yalnız Vaşinqtonun sanksiyalar siyasətində müəyyən yumşalma baş verə bilər.
