Müəllif: Gülnar Əhmədli, Banco.az
Bəzən səhərlər oyanıb işə getmək çox çətin gəlir. Saysız tapşırıqlar, bitməyən görüşlər, ard-arda gələn e-poçtlar və s. İş həyatı bəzən stres mərkəzinə çevrilə bilər. Ancaq iş stresi ilə mübarizə aparmağın yolları var. Bunlardan qurtulmaq üçün ata biləcəyiniz addımları nəzərdən keçirək.
İş stresinin əlamətləri hansılardır?
İş stresi bir çox fərqli simptomlar göstərə bilər. Bu simptomlar adətən fiziki, emosional və davranışda özünü göstərir.
Fiziki simptomlara baş ağrısı, əzələ gərginliyi, mədə pozğunluğu və yuxu problemləri daxil ola bilər. Emosional olaraq, narahatlıq, əsəbilik və motivasiyanın olmaması ön plana çıxa bilər. Davranış baxımından bu, diqqətin azalması, sosial münasibətlərdəki problemləri əhatə edə bilər.
Simptomlardan xəbərdar olmaq və lazımi tədbirləri görmək iş stresi ilə mübarizədə fərq yaradan bir addımdır.
İş stresinə səbəb olan hallar
Güclü iş yükü: Heç vaxt bitməyən tapşırıqlar siyahısına sahib olmaq.
Zəhərli iş mühiti: Menecerlər və həmkarlar tərəfindən dramatik situasiyaların yaradılması, dedi-qodu və ya dəstəklənməyən davranışlar.
Balanssız iş-özəl həyat: İş və şəxsi həyatınızı tarazlaya bilməmək.
Gələcəklə bağlı narahatlıq: Vəzifədə yüksəlişin və maaşda artımların olmaması kimi səbəblər.
İş stresi üçün nə yaxşıdır?
İş stresi ilə mübarizə üsulları arasında bir neçə vacib məqam var. Bunlardan birincisi mütəmadi olaraq idman etməkdir. Məsələn, səhər qısa bir qaçış və ya axşam yoqa təkcə fiziki olaraq rahatlamanıza kömək etmir, həm də əhvalınızı yaxşılaşdırır. Bundan əlavə, məşq maddələr mübadiləsini sürətləndirərək stress hormonlarını azaltmağa kömək edir.
Ruhən rahatlıq üçün gün ərzində qısa fasilələr verə bilərsiniz. Məsələn, qəhvə fasiləsi kimi kiçik şeylər zehninizin dincəlməsinə və diqqət vaxtınızı artırmağa kömək edə bilər.
Gərgin bir günün ardından özünüzə vaxt ayıraraq özünüzü mükafatlandıra bilərsiniz. İşdən sonra zövq aldığınız fəaliyyətlə məşğul ola və ya sevdiyiniz filmə baxa bilərsiniz. Özünüzü mükafatlandırmaq, yaşadığınız stressi unutmağınıza və rahatlamağınıza kömək edəcək.
