Daha bir şəhidimiz haqqında sənədli film çəkilib.
1991-ci ildə Rusiya Federasiyasının Arxangelsk şəhərində Meşəçilik Təsərrüfatı İnstitutunda təhsilini yarımçıq qoyub Ağdama qayıdan Yolçuyev Nurəddin Novruz oğlundan bəhs edən film “Tamamlanmayan döyüş gündəliyi” adlanır.
Nurəddin Novruz oğlu Yolçuyev 29 iyul 1963-cü ildə Ağdam rayonunun Quzanlı kəndində anadan olub. 1980-ci ildə orta məktəbi bitirib.
Hərbi xidmətini 1981ci ildən 1983-cü ilə qədər Almaniya Demokratik Respublikasında yerinə yetirib. Xidmət keçdiyi hissənin komandanlığı ona ali hərbi məktəbə gedib zabit kimi xidmətə qayıtmağı tməyi təklif edir, ancaq ailəsi razı olmadığina görə Nurəddin doğulduğu kəndə qayıdır.
1985-ci ildə ali təhsil almaq üçün Rusiyanın Arxangelski vilayətinə gedir. Orada zavodda işə düzəlir və instituta qəbul olur.
1991-ci ilin payızında Arxangelskidə yaşayan bir qrup azərbaycanlı ilə birgə təhsillərini yarımçıq qoyub Vətənin müdafiəsi üçün könüllü olaraq birbaşa Ağdama yollanır. Milli Qəhrəman Asif Məhərrəmovun rəhbərlik etdiyi özünümüdaviə batalyonunda könüllü xidmətə başlayır. Daha sonra polkovnik-leytenant Şirin Mirzəyev tərəfindən yaradılan alayın 4-cü batalyonunda xidmətini davam etdirir. Yerli camaat trəfindən “Kötəl batalyonu” kimi tanınan bölmənin iştirak etdiyi döyüş əməliyyatlarında böyük şücaət göstərir.
Nurəddin Novruz oğlu Yolçuyev 20 oktyabr 1992-ci ildə Ağdam rayonunun Əliağalı kəndi ərazisində şəhid olub. Film “Vətən Media” Yaradıcılıq Qrupu tərəfindən hazırlanıb. İdeya müəllifləri jurnalist Elman Cəfərli və Qüdrət Yolçuyev, rejissoru Teymur Zahidoğlu, operatorlar Şakir Məmmədov, Fəxri Məmmədovdur. Mətni jurnalist Hürü Əliyeva səsləndirib.
Filmdə Birinci Qarabağ müharibəsindəki döyüş əməliyyatlarını, eləcə də bölgədə gedən ictimai-siyasi-prosesləri hərbi reportyor kimi lentə almış Şakir Məmmədovun şəxsi arxivindən, müəllifi məlum olmayan vidogörüntülərdən, Şəmistan Əlizamanlının ifasında səslənən Vətənpərvərlik mahnılarından istifadə olunub.
