“Çelsi”nin ukraynalı cinah hücumçusu Mixaylo Mudrikin sevgilisi, model Violetta Bert futbolçu ilə münasibətlərinə xitam verib.
Arena.az bu barədə “Daily Mail” dərgisinə istinadən məlumat verir.
Mənbənin məlumatına görə, indi sarışın gözəl “Yuventus”un amerikan yarımmüdafiəçisi Ueston Makkenniyə mehr salıb.
Xatırladaq ki, daha əvvəl Mudrik dopinq müayinəsindən müsbət nəticə ilə çıxıb, futbolçunun qanında qadağan edilmiş maddə olan mildronat aşkarlanıb. Hazırda futboldan müvəqqəti kənarlaşdırılmış ukraynalı futbolçu 4 illik cəza təhlükəsi ilə üz-üzədir. Necə deyərlər, dərd gələndə, batmanla gəlir.
Mixaylo Mudrik Donetsk “Şaxtyor”unun yetirməsidir. Ukraynalı cinah hücumçusu karyerası ərzində Kiyev “Arsenal”ı və “Desna”da icarə əsasında oynayıb, 2023-cü ilin yanvarında isə 70 milyon avro məbləğ müqabilində “Şaxtyor”dan “Çelsi”yə keçib.
Mudrik cari mövsümdə “zadəganlar”ın heyətində 15 oyuna çıxıb, 3 qol vurub, 5 məhsuldar ötürmə verib.
Mudrikin “Çelsi” karyerası ümumilikdə 73 oyun, 10 qol və 9 məhsuldar ötürmədən ibarətdir.
Mudirikin qənimətlər muzeyində “Şaxtyor”la qazandığı Ukrayna çempionluğu və Ukrayna Kuboku var. 2022-ci ildə isə Mudrik Ukraynada ilin futbolçusu seçilib.
Mixaylo Mudrik 2022-ci ilin iyununda debüt etdiyi Ukrayna yığmasının heyətində 28 oyuna 3 qol, 5 məhsuldar ötürmə ilə fərqlənib.
“Transfermarkt” internet-portalı 23 yaşlı ukraynalı sol cinah hücumçusu Mixaylo Mudrikin transfer dəyərini 30 milyon avro məbləğində qiymətləndirir.
