Fransa Cənubi Qafqazı yenidən müharibə ocağına çevirmək siyasətindən əl çəkməlidir

“Uzun illər Ermənistanın işğalçılıq siyasətinə açıq dəstək verən Fransa 2020-ci ildə 44 günlük Vətən savaşında əldə etdiyimiz tarixi Zəfəri hələ də həzm edə bilmir. Odur ki, Azərbaycana qarşı təzyiq və əsassız hücum siyasətindən əl çəkmir. Əslində, erməniçilik, ermənipərəstlik Fransanın daxili və xarici siyasətində hər zaman olub. Sadəcə olaraq Makron Fransasında bu siyasət belə deyək ki, lap əndazəsini aşıb”.

Bunu Demokrat.az-a açıqlmasında Milli Məclisin deputatı Vüqar İskəndərov deyib.

Deputat bildirib ki, bu gün öz daxilində problemlər girdabında boğulan, həmçinin müstəmləkəçilik siyasəti ucbatından çoxsaylı təzyiqlərlə üzləşən Makron Fransası bundan çıxış yolunu yenə də Azərbyacana hədyan yağdırmaqda görür:

“Heç uzağa getməyək. Yanvarın 6-da Fransa Prezidenti Emmanuel Makron səfirlər konfransında çıxışı zamanı bildirib ki, Ermənistana münasibətdə Rusiya müttəfiqlik əlaqələrinə dəyişiklik edərək, Azərbaycanın fəaliyyətini dəstəkləyib. Təbii ki, Makronun bu məsələyə yanaşmada ifrat erməniçilik etdiyi bütün çılpaqlığı ilə ortadadır. Lakin onun dilə gətirdiyi digər fikir isə Azərbaycan düşmənçiliyinin növbəti bariz nümunəsidir. Məsələ burasındadır ki, Makron "Fransanın bir çox dənizaşırı ərazilərində, xüsusilə də Yeni Kaledoniyada Azərbaycan tərəfindən qəbuledilməz müdaxilələrlə hücumlara məruz qalıb. Bizim beynəlxalq hüququ və Ermənistanı müdafiə etdiyimizi anlamayan Azərbaycan bununla məsələni həll etdiyini düşünür” iddiasını ortaya qoyub”.

V.İskəndərov vurğulayıb ki, Makronun bu iddiası bir sıra reallıqlardan xəbər verir:

“Əvvəla bu Makronun və onun timsalında Fransanın Ermənistanın işğalçılıq siyasətini dəstəkləməsinin açıq etirafı kimi qəbul edilməlidir. Çünki özünü beynəlxalq hüququn müdafiəçisi kimi təqdim edən Fransa Azərbaycana münasibətdə beynəlxalq hüququn norma və prinsiplərinin kobud şəkildə pozulmasını, Ermənistanın Azərbaycana qarşı həyata keçirdiyi etnik təmizləmə siyasətini, kütləvi qırğınları və insanlıq əleyhinə cinayətləri heç vaxt tənqid etməyib. Əksinə, Makron yuxarıda bəhs edilən çıxışında bir daha Ermənistanı müdafiə etdiklərini bildirib. Ümumiyyətlə Azərbaycan XİN-in münasibətində də qeyd edildiyi kimi Ermənistanı revanşizmə hazırlayan, bu ölkənin geniş şəkildə silahlanmasını həyata keçirən Fransanın bu kimi təhrikçi açıqlamaları qətiyyən qəbuledilməzdir”.

O ki, qaldı digər məqama millət vəkili bildirib ki, Makronun “Fransanın özü son aylarda bir çox dənizaşırı ərazilərində, xüsusilə də Yeni Kaledoniyada Azərbaycan tərəfindən qəbuledilməz müdaxilələrlə hücumlara məruz qalıb” ilə bağlı cəfəng iddiası həm gülüş doğurur, həm də rəsmi Parisin çıxılmaz durumda olduğundan xəbər verir:

“Yəni rəsmi Parisin məkrli neokolonial siyasətinin təzahürü olan dənizaşırı ərazilərində apardığı uğursuz fəaliyyətin səbəblərinin Azərbaycan üzərinə yönləndirilməsi Makron Fransasının yanlış siyasətindən xəbər verir. Hesab edirəm ki, Fransa, bu ölkənin rəhbəri digər ölkələri təqsirləndirmək əvəzinə, həyata keçirilən səriştəsiz xarici siyasətdən dərs çıxarmalıdır. Ümumiyyətlə isə Fransa bir an öncə Cənubi Qafqazı yenidən müharibə ocağına çevirmək siyasətindən əl çəkməlidir”.

Leyla
Demokrat.az

Fransa Cənubi Qafqazı yenidən müharibə ocağına çevirmək siyasətindən əl çəkməlidir —Deputat

Hesaba daxil ol

Qeydiyyatdan keç

Şifrəni bərpa et