İsveçrə yığmasının və Almaniyanın “Auqsburq” klubunun vingeri Ruben Varqas bundan sonra “Sevilya”nın uğurları üçün çalışacaq.
Arena.az bu barədə İspaniya klubunun rəsmi saytına istinadən xəbər verir.
La Liqa təmsilçisi bu transferi 2,5 milyon avro müqabilində gerçəkləşdirib. 26 yaşlı futbolçu ilə müqavilənin müddəti 2029-cu ilin 30 iyununa qədər nəzərdə tutulub. O, yeni komandasında 5 nömrəli formanı geyinəcək.
Ruben Varqas İsveçrənin “Lütsern” klubunun yetirməsidir. O, “Auqsburq”a 2019-cu ilin iyul ayında 4 milyon avro müqabilində elə “Lütsern”dən keçmişdi. İsveçrəli futbolçu Almaniya klubunun heyətində cari mövsümdə 10 oyuna çıxıb, 1 qola imza atıb. Varqasın “Auqsburq” karyerası bütövlükdə 161 oyun, 23 qol və 19 məhsuldar ötürmədən ibarətdir.
İsveçrənin U-20 və U-21 yığmalarında da oynamış Ruben Varqas 2019-cu ilin sentyabr ayında əsas millidə debüt edib. O, İsveçrə yığmasının heyətində meydana çıxdığı 50 oyunda 8 qol vurub, 8 məhsuldar ötürmə verib.
“Transfermarkt” internet-portalı 26 yaşlı yarımmüdafiəçinin transfer dəyərini 7 milyon avro məbləğində qiymətləndirir.
