“Barselona”nın polyak mərkəz hücumçusu Robert Levandovski hesab edir ki, “blauqrana” kiçik oyunlarda daha da yaxşı çıxış etməlidir.
Arena.az ESPN şəbəkəsinə istinadən, polyak ulduzun bu barədə qənaətini təqdim edir:
“Hər şeyi qazana biləcəyimizi söyləmək hələ tezdir. Əlbəttə, biz hamını məğlub edə bilərik. Ancaq hər şeyi qazanmaq üçün mövsüm boyu fürsət gərəkdir. Bizim heyrətamiz imkanımız var, amma imkan bir xüsusdur, zehniyyət digər bir xüsus.
Bizim sübut edəcəyimiz çox xüsus var, amma çempionluğu qazanmaq istəyiriksə, kiçik oyunlarda da qalib gəlməliyik. “Barselona” bir neçə xal itirib… Mən, “kiçik” oyunlarda demək istəmirəm, amma insanların o qədər də vacib hesab etmədiyi oyunlarda, baxmayaraq ki, bizim üçün bu, vacib olmalıdır”, deyə polşalı forvard vurğulayıb.
Robert Levandovski “Barselona”ya 2022-ci ilin iyul ayında 45 milyon avro məbləğ müqabilində “Bayern”dən keçib. Tərəflər arasındakı müqavilə daha 1 il müddətinə uzadılması imkanı ilə 2026-cı il iyun ayının sonuna qədər qüvvədədir.
Polyak hücumçu cari mövsümdə “Barselona”nın heyətində 26 oyuna çıxıb, 25 qol vurub və 2 məhsuldar ötürmə verib.
Levandovskinin Kataloniya klubu üçün çıxışı ümumilikdə 121 oyun, 84 qol və 19 məhsuldar ötürmədən ibarətdir.
Təcrübəli hücumçu karyerası ərzində “Borussiya” (Dortmund), “Lex” (Poznan), “Zniç”, “Legiya” (Varşava) və “Delta” komandalarında da çıxış edib.
Robert Levandovski hazırda kapitanı olduğu və 2008-ci ilin sentyabr ayında debüt etdiyi Polşa yığmasının heyətində 156 oyun keçirib, 84 qol vurub, 35 məhsuldar ötürmə verib. Robert hər iki göstərici üzrə Polşa yığma komandasının mütləq rekordçusudur.
“Transfermarkt” internet-portalı 36 yaşlı polyak hücumçunun transfer dəyərini 15 milyon avro məbləğində qiymətləndirir.
