Argentinanın “Atletiko Lanus” klubunun sol cinah müdafiəçisi Xulio Soler bundan sonra “Bornmut”un uğurları üçün çalışacaq.
Arena.az xəbər verir ki, bu barədə Premyer Liqa təmsilçisi rəsmi saytı vasitəsilə məlumat yayıb.
İngiltərə klubu bu transfer üçün Argentina təmsilçisinə 8 milyon avro ödəyib. 19 yaşlı futbolçu ilə imzalanmış müqavilənin müddəti və digər detalları açıqlanmayıb.
Soler “Lanus”un öz yetirməsidir. Gənc müdafiəçi Argentina klubunun əsas komandasının heyətində meydana çıxdığı 58 oyunda 2 məhsuldar ötürmə müəllifi olub.
Xulio Soler Argentinanın U-20, U-23 və Olimpiya yığmalarının heyətində meydana çıxsa da, hələ əsas millidə debüt şansı qazanmayıb.
“Transfermarkt” internet-portalı 19 yaşlı müdafiəçinin transfer dəyərini 8 milyon avro məbləğində qiymətləndirir.
“Bornmut” əslən Kanadadan olan hücumçusu Daniel Jebbisonu da bu mövsümün əvvəlində icarəyə verdiyi “Uotford”dan geri çağırıb. 21 yaşlı forvard “Uotford”un heyətində cəmi 13 matça çıxsa da, fərqlənə bilməyib. “Bornmut” Jebbisonu 2024-cü ilin yayında “Şeffild Yunayted”dən azad agent kimi heyətinə qatmışdı. 21 yaşlı futbolçunun bu klubla 2028-ci ilin 30 iyununa kimi müqaviləsi mövcuddur. O, “Bornmut”un heyətində 4 oyuna çıxıb, 1 qol vurub.
Daniel Jebbison İngiltərədə “Çorli” və “Barton” kimi klublarda, İngiltərənin U-18, U-19 və U-20 yığmalarında da oynayıb.
“Transfermarkt” internet-portalı 21 yaşlı hücumçunun transfer dəyərini 1,2 milyon avro məbləğində qiymətləndirir.
“Bornmut”un mərkəz yarımmüdafiəçisi Filip Billinq isə icarə müqaviləsi əsasında İtaliyanın “Napoli” klubuna keçib. Danimarka yığmasının da üzvü olan 28 yaşlı futbolçu bu mövsümün sonunadək icarədə olacaq.
Filip Billinq “Esbyerq”in yetirməsidir. O, daha sonra İngiltərənin “Haddersfild” klubunda çıxış edib. “Bornmut” Billinqi 2019-cu ilin iyulunda 16,5 milyon avro müqabilində heyətinə qatmışdı. Yarımmüdafiəçi bu klubun heyətində 201 oyuna çıxıb, 31 qol və 20 məhsuldar ötürmə müəllifi olub.
Danimarkanın U-19, U-20 və U-21 yığmalarında oynadıqdan sonra Billinq, 2020-ci ilin oktyabrında əsas millidə debüt edib. O, bu komandanın heyətində 5 oyuna çıxıb, məhsuldarlıq nümayiş etdirməyib.
“Transfermarkt” internet-portalı 28 yaşlı yarımmüdafiəçinin transfer dəyərini 14 milyon avro məbləğində qiymətləndirir.
