Qazaxıstanın su ehtiyatları və irriqasiya naziri Nurjan Nurjigitov Aral dənizin mühafizəsi layihəsinin birinci mərhələsinin icrasına yekun vurulduğunu, Şimali Aralda suyun həcminin 27 milyard kubmetrə çatdığını bilirib.
Hafta.az-ın yazdığına görə, nazir deyib ki, dənizdə suyun həcmi 42 faiz artıb və nəticədə suyun tərkibində duzluluq təxminən dörd dəfə azalıb. O qeyd edib ki, suyun həcminin artması ilə yanaşı həm də illik balıq ovunun həcmi 8 min tona yüksəlib.
Bundan əlavə, dövlət rəsmisi yerli sakinlərlə Şimali Aral dənizinin bərpası layihəsinin ikinci mərhələsinin icrasını müzakirə edib.
Ölkə prezidentinin tapşırıqlarını yerinə yetirmək üçün nazirlik “Aral dənizinin şimal hissəsinin regional inkişafı və bərpası” layihəsini hazırlayıb. Layihə üç əsas istiqaməti əhatə edir. O cümlədən, Şimali Aral dənizində suyun yığılmasının həcminin və səmərəliliyinin artırılması, su ehtiyatlarının idarə edilməsinin təkmilləşdirilməsi, balıqçılıq və ekoturizmin inkişafı, rayonun ekoloji vəziyyətinin yaxşılaşdırılması istiqamətində tədbirlər nəzərdə tutulur.
2024-cü ildə Su Ehtiyatları və İrriqasiya Nazirliyi Aral dənizinə 2,6 milyard kubmetrə yaxın su axınını təmin edib. Xüsusilə, suvarma dövründə rekord həcmdə 1 milyard kubmetr su göndərilib. Bu, Sırdərya çayının suyunun savadlı paylanması və ona qənaət edilməsi sayəsində mümkün olub. Müqayisə üçün qeyd edək ki, 2022-ci ildə Aral dənizinə cəmi 816 milyon kubmetr su daxil olub.
“Bu rəqəmlər son iki ildə aparılan sistemli işlərin nəticəsidir. Biz transsərhəd çaylarda su ehtiyatlarına qənaət və ədalətli bölgü məsələlərində qonşu ölkələrlə anlaşma əldə etmişik. Danışıqları davam etdirəcəyik və mühüm su anbarlarının sabit səviyyəsini saxlamaq üçün hər cür səy göstərəcəyik. Aral dənizinin bərpası layihəsi, ilk növbədə, regionda ekoloji vəziyyətin yaxşılaşdırılması, balıqçılıq və turizmin inkişafına, əhalinin rifahının yaxşılaşdırılmasına yönəlib”, - deyə nazir Nurjan Nurjigitov bildirib.
