Norveçin “Molde” klubunun sol cinah müdafiəçisi Matias Lövik bundan sonra “Parma”nın uğurları üçün çalışacaq.
Arena.az bu barədə İtaliya klubunun rəsmi saytına istinadən xəbər verir.
“Parma” bu transfer üçün “Molde”yə 6 milyon avro ödəyib. 21 yaşlı norveçli futbolçu ilə müddəti 2029-cu ilin 30 iyununa qədər nəzərdə tutulmuş müqavilə imzalanıb.
Matias Lövik “Molde”nin öz yetirməsidir. O, 2022-ci ilin yanvarından Norveç klubunun əsas komandasında forma geyinirdi. Gənc müdafiəçi “Molde”nin əsas komandasının heyətində meydana çıxdığı 109 oyunda 7 qol vurub, 12 məhsuldar ötürmə müəllifi olub. O, “Molde” ilə bir dəfə (2022) Norveç çempionu, iki dəfə (2021, 2023) Norveç Kubokunun qalibi olub.
Lövik Norveçin U-16, U-17, U-18, U-19, U-20, U-21 yığmalarında forma geyinsə də, hələ əsas millidə debüt şansı qazanmayıb.
“Transfermarkt” internet-portalı 21 yaşlı müdafiəçinin transfer dəyərini 5 milyon avro məbləğində qiymətləndirir.
