ABŞ-ın yeni prezidenti Tramp tarixi sülh sazişi üçün Ermənistanın baş naziri Nikol Paşinyanı və Azərbaycan prezidenti İlham Əliyevi Ağ Evə dəvət edə bilər.
AzPost bildirir ki, bu barədə “The Wall Street Journal” nəşrinin məqaləsində bildirilib.
Qəzet qeyd edir ki, Trampın mürəkkəb Ukrayna müharibəsindən daha az səy tələb edən, lakin əhəmiyyətli mükafatlar verən sülh üçün bir fürsət var: Ermənistan və Azərbaycan arasında onilliklərdən bəri davam edən düşmənçiliyə son qoya bilər.
“ABŞ-ın yüksək rütbəli rəsmilərinin iştirakı olmadan danışıqlar dalana dirənmək təhlükəsi ilə üzləşir. Bu, Rusiyaya regionda öz təsirini bərpa etmək imkanı verir. Həmçinin regionda onilliklər boyu davam edən düşmənçiliyə son qoyacaq razılaşmanı təmin edə bilər”-deyə nəşr vurğulayıb.
Yazıda bildirilir ki, Cənubi Qafqazda sülh postsovet respublikalarına iqtisadi suverenliyi bərpa etməkdə və neoimperialist Rusiyanı cilovlamaqda kömək etməklə ABŞ və onun müttəfiqlərinin xeyrinə olardı.
Sülh sazişi həmçinin Avropa bazarlarını Mərkəzi Asiya resursları və nadir torpaq metalları daxil olmaqla, inkişaf, ticarət və enerji əməkdaşlığı üçün imkanlar açan mühüm ticarət marşrutu olan Orta Dəhlizə çıxışı genişləndirə bilər.
“Trampın yanaşması Türkiyə kimi çətin bir müttəfiqlə də münasibətləri yaxşılaşdıra bilər. ABŞ-Türkiyə münasibətləri Trampın ilk administrasiyası dövründə gərgin olub, lakin prezident Rəcəb Tayyib Ərdoğan Ermənistan və Azərbaycan arasında sülh müqaviləsini dəstəklədiyini bildirib və bu baş verdikdən sonra Ermənistanla sərhədi açacağını və diplomatik münasibətləri bərpa edəcəyini vəd edib”deyə məqalədə vurğulanır.
