"Bir çoxları bu təyinatı Livanla İsrail arasında 14 ay davam edən müharibədən sonra ümid işığı kimi görür..."
Livanın yeni seçilmiş prezidenti Cozef Aun baş nazir vəzifəsinə Nəvaf Salamı təyin edib.
Moderator.az xəbər verir ki, bu barədə "euronews.com" nəşri məlumat yayıb.
Salam bu təyinatdan öncə Haaqadakı BMT-nin Beynəlxalq Ədalət Məhkəməsinə (BƏM) rəhbərlik edib. Livan prezidenti bu qərarı parlamentin 84 deputatının onun namizədliyini dəstəkləməsindən sonra qəbul edib.
Nəvaf Salamın namizədliyini qərbmeyilli siyasi qüvvələrdən olan deputatlar və müstəqil millət vəkilləri dəstəkləyib. Salam həmçinin Səudiyyə Ərəbistanının dəstəyindən də yararlanır. Buna baxmayaraq, "Hizbullah" hərəkatına mənsub deputatlar baş nazir postuna namizəd irəli sürməkdən çəkinib.
Bir çoxları Salamın təyinatını Livan-İsrail arasında 14 ay davam edən müharibədən sonra ümid işığı kimi görür. Bu müharibə nəticəsində ən azı 4 min nəfər həlak olub, təxminən 20 min nəfər yaralanıb. Münaqişə ölkədə, xüsusən də cənub bölgələrində genişmiqyaslı dağıntılara səbəb olub. Paytaxt Beyruta da zərər dəyib. İtkilər yüz milyonlarla avro dəyərində qiymətləndirilir. Noyabrın sonunda ABŞ-ın vasitəçiliyi ilə əldə edilmiş 60 günlük atəşkəs qüvvəyə minib.
Salamın təyinatının elan olunmasından sonra Beyrut sakinləri küçələrdə fişənglər ataraq təntənəli şəkildə bunu qeyd edib. Çoxları ümid edir ki, Salamın təyinatı və keçən həftə Cozef Aunun prezident seçilməsi ölkəyə xarici donorlar tərəfindən milyardlarla dollar dəyərində investisiya və kreditlərin cəlb olunmasına səbəb olacaq.
Müşahidəçilərin fikrincə, nə Aun, nə də Salam son onilliklərdə ölkədə geniş yayılmış korrupsiya və iqtisadi idarəsizliyə görə tənqid olunan siyasi elitanın bir hissəsi hesab edilmir. Bu idarəsizlik Livanı ağır iqtisadi böhrana sürükləyib.
Son illərdə "Hizbullah" Salamın baş nazir postuna namizəd olmasına dəfələrlə mane olub, onu ABŞ-ın dəstəklədiyi namizəd kimi xarakterizə edib.
"Hizbullah"ın parlamentdəki blokunun rəhbəri Məhəmməd Raad prezident Aunla görüşdən sonra bildirib ki, "işğalçıları ölkədən çıxarmaq, məhbusları geri qaytarmaq, Livanı bərpa etmək və İsrail ilə "Hizbullah" arasındakı müharibəyə son qoyan BMT Təhlükəsizlik Şurasının qətnaməsini yerinə yetirmək" üçün konkret addımlar gözləyir.
Raad əlavə edib ki, keçən həftə "Hizbullah" prezident Aunun seçilməsinə dəstək olaraq əl uzadıb, lakin qarşı tərəfdən bu jestə qarşılıq verilməyib.
Prosesi nə gözləyir?
Nəvaf Salamın baş nazir təyinatından sonra Livana qayıtması gözlənilir. Çərşənbə axşamı onun prezident Cozef Aun və parlament spikeri Nəbih Berri ilə Beyrutdakı prezident sarayında görüşü planlaşdırılıb. Görüşdə yeni kabinetin formalaşdırılması prosesinə rəsmən başlanılacaq.
Hələlik Salamın BMT-nin Beynəlxalq Ədalət Məhkəməsindəki sədr vəzifəsindən istefa verib-verməyəcəyi məlum deyil.
Salamın qarşısında İsrail ilə atəşkəsdən sonra baş verən dağıntıların nəticələrini aradan qaldırmaq, həmçinin müharibə zamanı evlərini tərk etmək məcburiyyətində qalan bir milyon insana kömək etməklə altı milyondan az əhalisi olan ölkəni beş illik iqtisadi böhrandan çıxarmaq kimi ciddi vəzifələr dayanır.
Nəvaf Salam kimdir?
71 yaşlı Nəvaf Salam Beyrutun məşhur sünni-müsəlman ailələrindən birinin üzvüdür. Onun əmisi Səib Salam Fransa işğalından müstəqillik uğrunda mübarizə aparan Livan liderlərindən biri olub və bir neçə dəfə baş nazir postunu tutub. Salamın əmisi oğlu Tammam Salam isə 2014-cü ildə iki il müddətində hökumətə rəhbərlik edib.
Nəvaf Salam Fransanın nüfuzlu Sciences Po universitetində siyasi elmlər üzrə doktorluq dərəcəsi, Sorbonna Universitetində isə tarix üzrə doktorluq dərəcəsi alıb. O, həmçinin Harvard Hüquq Məktəbinin hüquq üzrə magistr dərəcəsinə sahibdir.
Salam müxtəlif universitetlərdə müəllim kimi fəaliyyət göstərib. 2007-ci ildə Livanın BMT-dəki səfiri təyin edilib və bu vəzifədə 10 il çalışıb. 2018-ci ildə Salam BMT-nin Beynəlxalq Ədalət Məhkəməsinin hakimi seçilib və ötən ilin fevralında həmin məhkəmənin sədri olub. O, bu vəzifəni tutan ilk Livan vətəndaşıdır.
