İsveç hökuməti bir neçə il ərzində dövlət qulluğu iştirakçılarının sayını 3000-ə çatdırmaq niyyətindədir.
AZƏRTAC xəbər verir ki, 2008-ci ildə ləğv edildikdən sonra ötən il bərpa edilən xidmətə hazırda xilasetmə işləri və mülki müdafiə üzrə təlim keçmiş 300 nəfər daxildir. Bu təşəbbüsün bərpası Ukraynadakı müharibə təcrübəsindən çıxarılan nəticələrlə bağlıdır.
İsveçin mülki müdafiə naziri Karl-Oskar Bolin bildirib ki, xidmətin genişləndirilməsi iki istiqamətdən ibarət olacaq. Onlardan birincisi xilasetmə xidmətində işləmək üçün daha uzun təlimləri əhatə edir, çünki müharibə şəraitində ən böyük stresi yaşayan bu xidmətdir. İkinci sahə əhali üçün sığınacaqları idarə etmək üçün kadrların hazırlanmasıdır ki, bu da nizam-intizamı və ventilyasiya sistemləri kimi texniki xidmətin təmin edilməsini nəzərdə tutur.
Fövqəladə Halların İdarə Edilməsi və Mülki Müdafiə Agentliyinə proqramın təfərrüatlarını hazırlamaq, o cümlədən ehtiyac duyulan vəzifələri və təlimin məzmununu müəyyən etmək, habelə xərclərin hesablanması tapşırılıb. Hesabat dekabrın 10-dək təqdim edilməlidir.
