HƏMAS Qətərin paytaxtı Dohada Qəzzada atəşkəs və əsir mübadiləsinə dair İsrail və HƏMAS arasında çoxdan gözlənilən razılaşmanın yekun mərhələsinə çatdığını açıqlayıb.Açıqlamada Fələstin qruplarının liderləri ilə danışıqların razılaşma tamamlanana qədər davam etməli olduğu vurğulanıb və Dohada danışıqlarda əldə olunan irəliləyişlə bağlı qruplarla bir sıra görüşlər və məsləhətləşmələr aparıldığı bildirilib.Bəyanata görə, Fələstin liderləri növbəti mərhələ üçün lazımi milli hazırlıqların görülməsinin vacib olduğunu vurğulayıblar. Liderlər danışıqların bu raundunun aydın və hərtərəfli razılaşma ilə nəticələnəcəyinə ümid etdiklərini bildiriblər.Qətər, Misir və ABŞ-ın vasitəçiliyi ilə HƏMAS və İsrail arasında aparılan dolayı danışıqlar girovların mübadiləsi və hücumların dayandırılması ilə bağlı yekun razılaşmanın formalaşdırılması üçün intensiv şəkildə davam edir.İsrailin baş naziri Benyamin Netanyahu Qəzza zolağında atəşkəs və əsir mübadiləsi ilə bağlı danışıqların aparıldığı Qətərə yüksək səviyyəli İsrail danışıqlar qrupunu göndərmək qərarına gəlib.İsrail mətbuatında yer alan xəbərlərə görə, İsrail və HƏMAS arasında əsir dəyişdirmə müqaviləsinin təfərrüatlarının 90 faizi razılaşdırılıb.Adının çəkilməsini istəməyən fələstinli mənbələr də atəşkəs və əsir mübadiləsi razılaşmasının demək olar ki, hazır olduğunu bildiriblər.
