Almaniyanın “Borussiya” (Dortmund) klubunun hücumçusu Donyell Malen bundan sonra “Aston Villa”nın uğurları üçün çalışacaq.
Arena.az bu barədə İngiltərə klubunun rəsmi saytına istinadən xəbər verir.
Premyer Liqa təmsilçisi bu transfer üçün “Borussiya”ya 25 milyon avro ödəyib. 25 yaşlı futbolçu ilə yeni klubu arasında imzalanmış müqavilənin müddəti və digər detalları açıqlanmır. Əslən Surinamdan olan niderlandlı hücumçu yeni komandasında 17 nömrəli formanı geyinəcək.
Qeyd edək ki, Donyell Malen “Ayaks”ın yetirməsidir. London “Arsenal”ının da sistemindən keçmiş forvard peşəkar karyerasına PSV-də başlayıb. Malen 2021-ci ilin iyul ayında məhz PSV klubundan 30 milyon avro qarşılığında Dortmund “Borussiya”sına keçmişdi. O, Almaniya klubunun heyətində 132 matça çıxıb. Hücumçu bu görüşərdə 39 qol vurub, 20 məhsuldar ötürmə müəllifi olub.
Malen Niderlandın müxtəlif yaş qrupları üzrə yığmalarında oynadıqdan sonra 2019-cu ilin sentyabr ayında əsas millidə debüt edib. O, Niderland millisində də 41 oyuna çıxıb, 9 qol vurub, 8 məhsuldar ötürmə müəllifi olub.
