Göyçay Rayon Məhkəməsində mənimsəmədə və vəzifə saxtakarlığında təqsirləndirilən Rəşad Hacıyevin (soyadı şərti) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Elçin Qurbanovun sədrliyi ilə keçirilən prosesdə hökm oxunub.
Məhkəmənin hökmü ilə o, 2 il 2 ay 28 gün müddətinə azadlıqdan məhrum edilib və məhkəmə iclas zalında həbsə alınıb.
İttihama görə, Rəşad Hacıyev 17 mart 2022-ci il tarixdən 17 fevral 2023-cü il tarixədək olan müddət ərzində “A+CO” ASC-nin Göyçay filialının Ağdaş bölgəsinin satış üzrə nümayəndəsi vəzifəsində işləyib. O, vəzifə təlimatına əsasən satışın təşkili, satış məntəqələrində olan maddi vəsaitə nəzarət edilməsi, inventarlar üzrə qalığın çıxarılması və sair xidmətlərin göstərilməsi üçün ona etibar olunan əmlakın satışını təşkil edərək müştərilərdən aldığı sifarişlər əsasında ASC tərəfindən ona təhkim olunmuş terminal ilə elektron formada yazdığı faktura əsasında mal sifariş vermək, satılmış mallara görə müştərilərdən aldığı pulları tam şəkildə, vaxtında şirkətin xəzinəsinə ödəmək və digər səlahiyyətlərə malik şəxs olmaqla öz qulluq mövqeyindən istifadə edib. Rəşad Hacıyev ASC-yə məxsus ümumilikdə 17901 manat məbləğində pulu ASC-nin Göyçay şəhərində yerləşən Göyçay filialının xəzinəsinə təhvil verməyərək mənimsəyib. Eyni zamanda 8100 manat dəyərində mal sifariş etməsi kimi bilə-bilə yalan məlumat daxil etməklə vəzifə saxtakarlığı törədib.
Kamal Məmmədov
