18 yanvar 2025-ci il tarixində, saat 10:45-də, Yeni Azərbaycan Partiyası Xətai rayon təşkilatının binasında (Ünvan Nəcəfqulu Rəfiyev, Bakı, Xətai, AZ1025) Xətai rayonunun şəhidlərinə həsr olunmuş “Əbədi Qəhrəmanlar” adlı kitabın təqdimat mərasimi keçiriləcək.
“İki sahil” xəbər verir ki, kitab Milli Məclisin deputatı Pərvanə Vəliyevanın təşəbbüsü ilə hazırlanmışdır. Tədbirdə Xətai rayonu ictimaiyyəti, İcra Hakimiyyəti, Milli Məclisin deputatları, Ağsaqqallar Şurası, şəhid ailələri və yaxınları iştirak edəcəkdir.
“Əbədi Qəhrəmanlar” kitabında 2016-cı il Aprel döyüşlərində, 2020-ci il Tovuz döyüşlərində, 44 günlük Vətən müharibəsində, eləcə də 2021-ci il helikopter qəzasında, 2022-ci ildə Kəlbəcər, Xocalı rayonu ərazisində Ermənistan silahlı qüvvələrinin geniş miqyaslı təxribatının qarşısının alınmasında, 2023-cü il Anti-terror əməliyyatında qəhrəmancasına həlak olan 89 şəhid haqqında məlumatlar yer alır.
Şəhidlərimizin fədakarlığını, onların vətən sevgisini və şücaətlərini gələcək nəsillərə çatdırmaq baxımından bu kimi materialların hazırlanması olduqca əhəmiyyətlidir.
Dövlət başçımız tərəfindən şəhidlərimizin qəhrəmanlığı daim xüsusi qiymətləndirilir, onların əmanəti olan ailələrinə dövlət qayğısı təmin edilir. Bu xüsusda, ölkə mediası da şəhidlərimizi diqqətdə saxlamaqla onlara dair müxtəlif materialları geniş ictimaiyyətə çatdırır ki, bu da onların Azərbaycan xalqının yaddaşında əbədi saxlanılmasına, tanıdılmasına töhfə verir.
Tədbirdə qəhrəman şəhidlərimizin şücaətindən danışılacaq, həmçinin qonaqlara “Əbədi Qəhrəmanlar” kitabı paylanacaq.
