Son günlərdə bəzi informasiya portallarında Azərbaycan Dövlət Neft və Sənaye Universitetində bir neçə müəllimin iş müqavilələrinin uzadılması üzrə müsabiqələrin nəticələri haqqında böhtan xarakterli fikirlər yer alıb. Xatırladaq ki, ali təhsil müəssisələrində kafedra müdiri, professor-müəllim vəzifələrinin tutulması haqqında Əsasnaməyə əsasən müəllim vəzifəsi müsabiqə yolu ilə 5 il müddətinə seçilir. Müddəti başa çatmış müəllimin vəzifəsinin tutulması üçün açıq müsahibə elan olunur və kafedra əməkdaşlarının səsverməsi yolu ilə həmin vəzifəyə seçki həyata keçirilir. Ən yaxşı müəllimlərin müsabiqə yolu ilə tədrisə cəlb edilməsi ali məktəblər üçün prioritet məsələlərdən olduğundan ADNSU-da səsvermənin bütün mərhələlərinin açıq və ədalətli keçirilməsi təmin edilib. Müsabiqənin nəticələrindən narazı qalan müəllimlərin şikayətləri istər Nəsimi rayonu Məhkəməsində, istərsə də Bakı Appelyasiya Məhkəməsində təmin olunmayıb, araşdırma zamanı şikayətlərdə qeyd olunan faktlar öz təsdiqini tapmayıb.
Bu barədə Pravda.az-ın sorğusuna cavab olaraq Azərbaycan Dövlət Neft və Sənaye Universitetindən (ADNSU) bildirilib.
"Bəzi məqalələrdə ADNSU-nun rektoru vəzifəsini müvəqqəti icra edən dosent Vazeh Əskərovun rəhbəri olduğu universitetdə guya ikinci ali təhsil alması barədə qeydlər həqiqəti əks etdirmir və elektron təhsil sistemi sayəsində bunu bir neçə kliklə öyrənmək olar. ADNSU obyektiv səbəblər üzündən yollarını ayırdığı müəllimlərin bir neçə informasiya portalında qərəzli kampaniya aparmasından təəssüf hissi keçirir. Ölkəmizin ən nüfuzlu ali məktəblərindən biri olan ADNSU-da son bir il ərzində müəllimlərin əmək haqqı 20% artıb, müəllimlərin dərs yükü azaldılıb, elmlə məşğul olmaq imkanlarının genişlənməsi sayəsində onların beynəlxalq elmi jurnallarda rekord sayda məqaləsi dərc olunub, alimlərimizin təqribən 70%-i əlavə maaş alır, yeni laboratoriyalar, karyera mərkəzi, layihələrin idarəolunması ofisi açılıb, universitetimiz nüfuzlu beynəlxalq reytinqlərdə irəliləyib, neft mühəndisliyi ixtisası üzrə dünyanın ən yaxşı ali məktəbləri sırasına daxil olub. Bir neçə müəllimin əsassız iddiaları universitetimizin imicinə zərər vurmaqla yanaşı ADNSU-da çalışan, hər gün öz biliklərini gənc nəslə ötürən yüzlərlə müəllimə, eləcə də bizdə təhsil alan 20,000-dək tələbəyə mənfi təsir göstərir. Biz, akademik mühitimizlə bağlı məsələlərin obyektiv və ədalətli müzakirəsinə çağırırıq. Belə sui-istifadələr gələcəyin mütəxəssislərinin formalaşdırılmasına, ölkəmizdə elm və təhsilin inkişafına kölgə salır", - məlumatda qeyd olunub.
