Paris, 15 yanvar, AZƏRTAC
Paris 1, Sürix və HEC universitetlərinin tədqiqatçıları 2007-2024-cü illər arasında iki milyon çıxışı semantik analiz edərək belə nəticəyə gəliblər ki, emosiya və tənqid ağıl və əsaslandırılmış müzakirələrdən üstünlük təşkil edir.
AZƏRTAC xəbər verir ki, Paris 1, HEC və Sürix universitetlərinin sosial elmlər üzrə tədqiqatçıları 2007-ci ildən bəri Fransa Milli Assambleyasındakı çıxışların təkamülünü təhlil ediblər. Nəticələr göstərir ki, Milli Assambleya getdikcə teatr səhnəsinə çevrilir, burada əsaslandırılmış müzakirələrdən çox, tənqid və emosiya ön plana çıxır. Bu qənaətə gəlmək üçün tədqiqatçılar 2007-ci ildən 2024-cü ilin iyun ayına qədər Milli Assambleyada edilən iki milyon çıxışın semantik təhlilini aparıblar. Bütün siyasi partiyalardan 1600-dən çox deputatın çıxışı süni intellekt vasitəsilə lüğət və ifadələrin istifadəsinə görə analiz edilib. Nəticələr göstərib ki, faktlara əsaslanan arqumentlərin hesabına emosional, xüsusilə də qəzəbli ritorikanın istifadəsi artıb. 2014-cü ildə çıxışların 22%-i emosional ritorikadan ibarət olduğu halda, bu nisbət 2024-cü ildə 40%-ə çatıb. Bu tendensiya xüsusilə “Əyilməz Fransa” (LFI) və Milli Birlik (RN) partiyalarının deputatları arasında daha çox müşahidə olunur.
Tədqiqat, həmçinin çıxışların müddətinin son 10 ildə təxminən iki dəfə azaldığını göstərir. Bunun bir izahı debatların daha konfliktli xarakter daşımasıdır, çünki deputatlar bir-birinin sözünü daha çox kəsirlər. Digər bir izah isə bəzi çıxışların sosial şəbəkələrdə yayılmaq üçün qəsdən qısaldılmasıdır. Xüsusilə tədqiqat göstərir ki, 150 sözdən ibarət qısa çıxışların sayı artıb, çünki bu format sosial şəbəkələrdə yayımlanacaq bir dəqiqəlik videolara uyğundur.
Bu dəyişikliklər siyasi nitqin yeni kodlarını əks etdirir. “Deputatlar artıq çıxışlarını həmkarlarına deyil, sosial şəbəkələrdəki izləyicilərinə ünvanlayırlar”, - deyə tədqiqatçılar qeyd edirlər. Bununla belə, daha emosional, qütbləşmiş və konfliktli olan bu “tamaşa” xarakterli çıxışlar seçicilər arasında inamsızlıq və məyusluğu artırmaqdadır. 2024-cü ildə CEVIPOF (Fransanın siyasi həyatını araşdıran mərkəz) vətəndaşlardan Fransa siyasi həyatı ilə bağlı fikirlərini soruşub. Əvvəlki sorğularla müqayisədə cavablarda iki əsas söz daha çox işlədilib: inamsızlıq və yorğunluq.
