Azərbaycan Kredit Bürosunun (AKB) biznesdən müştəriyə (B2C) formatında hazırlanmış rəqəmsal məhsulu olan “Findoc” portalının (Portal) istifadəçi sayı 100 minə çatıb.
Bu barədə Azərbaycan Kredit Bürosunun yaydığı məlumatda bildirilir.
Qeyd edilib ki, qabaqcıl beynəlxalq təcrübə əsasında hazırlanmış Portal vətəndaşlara, eləcə də, hüquqi şəxslər və sahibkarlıq fəaliyyəti ilə məşğul olan fiziki şəxslərə istənilən vaxt öz kredit tarixçələrinə və skor hesabatlarına çıxış əldə etmək imkanı yaradan innovativ platformadır.
Portaldan istifadə etməklə aşağıdakı xidmətlərdən yararlana bilərsiniz:
- kredit tarixçəsi;
- skor hesabatı;
- kredit tarixçəsinin mübahisələndirilməsi;
- gecikmə günləri ilə bağlı bildiriş;
- kredit hesabatının PDF formatında əldə edilməsi;
- kredit hesabatının Asan İmza ilə imzalanmış formada əldə edilməsi;
- kredit hesabatının AKB-nin rəsmi e-mail ünvanından digər e-mail ünvanına yönləndirilməsi.
https://findoc.az/ səhifəsinə daxil olmaqla qeydiyyatdan keçən şəxslər ildə iki dəfə ödənişsiz kredit və skor hesabatını əldə edə bilər.
Ödənişsiz sorğu limiti bitdikdən sonra göstərilən xidmətlərdən yararlanmaq üçün hər bir məhsul üzrə fərdi qaydada ödəniş və ya daha sərfəli olan abunəlik paketlərindən istifadə imkanı mövcuddur. Müvafiq ödənişlər Portal üzərindən və nağdsız qaydada həyata keçirilir.
Bununla yanaşı, qeydiyyatdan keçmiş istifadəçilərin kredit tarixçəsində gecikmə günlərinin yaranması ilə bağlı məlumatlandırma daim ödənişsiz olaraq həyata keçirilir.
Portal real-vaxt rejimində, 7/24 əsaslarla fəaliyyət göstərir.
Xatırladaq ki, Büro 15 yanvar 2018-ci il tarixində yaradılmışdır. Büro müştərilərin kredit tarixçəsini təşkil edən məlumatları kredit təşkilatları ilə yanaşı daha geniş mənbələrdən, o cümlədən lizinq, sığorta, kommunal xidmətlər göstərən müəssisələrdən, nisyə mal alqı-satqısı həyata keçirən şirkətlərdən, habelə borc öhdəliyi ilə bağlı digər məlumat bazalarından toplanılmasını, saxlanılmasını, təhlilini, kredit hesabatlarının formalaşdırılmasını, borcalanlara fərdi reytinqlərin verilməsini və digər əlavə dəyər yaradan xidmətlərin həyata keçirilməsini təmin edən qurumdur.
Hazırda Büroya qoşulmuş təşkilatların sayı 260-dan artıqdır.
