İqtisadçı alim əlavə edib ki, əks halda vəziyyət belə davam etdikcə, Azərbaycana idxal olunan avtomobillərin sayı da yüksəlir. Həm Bakı şəhərində ekoloji cəhətdən problemi müəyyən qədər tarazlamaq üçün, həm də insanların gediş-gəlişini asanlaşdırmaq və tıxacların qarşısını almaq üçün bu addımlar atılmalıdır. Urbanist İlkin Babayev isə tamamilə əks fikirdədir. O, universitetlərin köçürülməsini düzgün addım hesab etmir: “Şəhərdə tıxac yaranırsa, bunun bir yolu çeşidli ictimai nəqliyyatı inkişaf etdirməkdir. Əgər universitetləri Hövsana köçürsən, bu dəfə də Hövsan yolunda tıxac yaranacaq. Lap köçürülsün, ancaq orada işləyən professorlar, müəllimlər və digərləri kimsə tıxacsız şəhər istəyir deyə razıdırlar gedib çölün düzündə işləməyə? Bu məsələyə üçtərəfli baxmaq lazımdır. Tələbə şəhərçiyi belə qurulsa, tələbə ora gedib-gəlmək üçün ictimai nəqliyyatdan, taksidən istifadə edəcək, yəni sadəcə tıxacın yeri dəyişəcək”. İ.Babayevin sözlərinə görə, dünyanın heç bir yerində şəhərdəki tıxacı azaltmaq üçün paytaxt köçürmək, iş yerlərini köçürmək həll yolu sayılmır: “Bakı bu qədər insan üzərindən qurulmuş iqtisadiyyatla işləyir. Hər hansı bir müəssisənin köçürülməsi hər bir kəsə təsir edəcək. Çünki bu, iqtisadiyyatın təməl qanunudur: çox adam varsa, çox gəlir yeri var. Bu gün tıxacdan şikayətlənən sürücü sabah artıq iş yerlərinin olmamağından şikayətlənəcək. Özünə nəsə almaq istəsə, mağaza tapa bilməyəcək, çünki orada “part-time” işləyən tələbə artıq şəhərdə deyil deyə mağaza işləmir, yaxud bağlanıb. Dünyanın heç bir yerində paytaxt köçürülməsi töhfə vermir. Türkiyə buna nümunədir, paytaxtı Ankaradır, amma İstanbul dünyanın ən tıxaclı şəhəridir. Yəni paytaxtın hara olmağı əhəmiyyətli deyil, şəhərdə düzgün infrastruktur yaradılmalıdır. Bu gün institutu başqa yerə köçürmək, problemi başqa yerə köçürür, onu həll etmir”.
Urbanist tələbə yataqxanalarının tikilməsindən də bəhs edib: “Düşünmürəm ki, tələbə yataqxanalarının tikilməsi tıxacda rol oynasın. Bu, ancaq kirayə qiymətlərinə təsir edə bilər ki, camaatın canını absurd qiymətlərdən qurtarar. Sentyabrda ev qiymətləri pik həddə çatır, rayonlardan gələn tələbələr çətinlik çəkir. Yataqxanaların tikilməsi onlar üçün faydalı ola bilər”. Sevinc İbrahimzadə / Metbuat.az
