“Barselona”nın baş məşqçisi Hansi Flik İspaniya La Liqasının 20-ci turunda “Xetafe”yə qarşı keçirdikləri səfər oyununu (1:1) şərh edib.
Arena.az AS dərgisinə istinadən, alman mütəxəssisin bu barədə fikrini təqdim edir:
“Biz qələbə qazanmaq istəyirdik və buna imkanımız da vardı. Daha çox qol vura bilmədiyimiz üçün məyusuq. Bu, niyə baş verdi? Burada, Xetafedə gərginlik hiss edilir. Onlar yaxşı müdafiə olunurlar. Biz fürsətlər yaratdıq, amma son mərhələlərdə dəqiq ola bilmədik. Biz məşqləri davam etdirməliyik.
Yenə deyirəm, xüsusilə birinci hissədə imkanlarımız vardı. Məncə, ötürmələrimizdə hələ də dəqiqlik çatışmırdı…
Bu stadionda, hər an, hər təmasda çoxlu duyğular yaşanırdı. Mən heç vaxt belə bir məqamı yaşamamışam. Bu, mənim üçün yeni bir xüsusdur və buna öyrəşməliyəm”, deyə Hansi Flik bildirib.
20 oyundan 39 xalla “Barselona” İspaniya La Liqasının yarış cədvəlinin 3-cü pilləsində qərarlaşıb. “Xetafe” isə 20 oyundan 20 xalla 16-cı pillədədir.
La Liqaya 20 oyundan 44 xalla Madrid “Atletiko”su başçılıq edir. 19 oyundan 43 xalla 2-ci pillədə qərarlaşmış “Real” isə mümkün lider qismindədir.
