Çempionlar Liqasının Liqa mərhələsinin 7-ci turunun “Benfika” – “Barselona” oyunu (4:5) xoşagəlməz hadisə ilə yadda qalıb.
Arena.az “Barça Universal” dərgisinin “Movistar Plus+” rəqəmsal televiziyasının yayımına istinadən məlumat verir ki, oyun başa çatdıqdan sonra tribunalaraltı məkana aparan tuneldə “blauqrana” və “qartallar”ın oyunçularının iştirakı ilə böyük dava-dalaş düşüb.
Mənbənin məlumatına görə, polis hadisəyə müdaxilə edərək, “Barselona”nın braziliyalı cinah hücumçusu Rafinyanı “Benfika”nın oyunçularından uzaqlaşdırmağa məcbur olub. Rafinya isə “qartallar”ın düşərgəsinin onu təhqir etdiyini car çəkib:
“Onlar oyunun sonunda məni təhqir etdilər, mən də onları təhqirlə cavabladım. Əgər mənə hörmət edilərsə, qarşılığında mən də hörmətlə davaranıram. Fikrimcə, onlar vəziyyəti başa düşə bilərdilər, amma məni təhqir etməyə qalxdılar”, – nüfuzlu italyan jurnalist-insayder Fabritsio Romano Rafinyadan sitat gətirir.
Xatırladaq ki, “Barselona” bu oyunun gedişində iki dəfə iki top fərqi ilə geri düşsə də, fərqi bərpa edə bilib və yekunda təzminat vaxtında (90+6) vurduğu qolla 5:4 hesablı əzmkar qələbəni bayram edib. Qələbə qolunu məhz Rafinya “Benfika”nın qapısından keçirib. Ümumiyyətlə braziliya hücumçu bu oyunda iki qolla fərqlənib.
Rafinya Braziliyanın “Avai” klubunun yetirməsidir. Karyerasnın Avropa dönəminə “Vitoriya”da (Gimaraynş) başlamış futbolçu “Sportinq” (Lissabon), “Renn” və “Lids”də çıxış edib. 2022-ci ilin iyul ayında “Barselona” Rafinyanı 58 milyon avro məbləğ müqabilində “Lids”dən “blauqrana”nın heyətinə qatıb. Braziliyalı hücumçunun Kataloniya klubu ilə müqaviləsinin müddəti 2027-ci ilin iyun ayının sonuna qədər qüvvədədir.
Cari mövsümdə Rafinya “Barselona” üçün bütün yarışlarda 30 oyun keçirib, 22 qol və 11 məhsuldar ötürmə ilə fərqlənib.
Rafinyanın “Barselona” karyerası ümumilikdə 117 oyun, 42 qol və 36 məhsuldar ötürmədən ibarətdir.
Rafinya Kataloniya nəhəngi ilə 2022/2023-cü illər mövsümündə İspaniya La Liqasını qazanıb və həmin mövsüm İspaniya Super Kubokunun (2022/2023, 2024/2025) qalibi olub.
Rafinya 2021-ci ilin oktyabr ayında debüt etdiyi Braziliya milli komandasının heyətində 31 oyuna çıxıb, 10 qol vurub, 6 məhsuldar ötürmə verib.
“Transfermarkt” internet-portalı 28 yaşlı braziliyalı cinah hücumçusunun transfer dəyərini 80 milyon avro məbləğində qiymətləndirir.
