“SOCAR Midstream Operations” MMC yeni ofisi üçün divar rəsmi (mural) yaratmaq üçün rəssamları işə dəvət edir.
İndex.az xəbər verir ki, yüksək mərtəbədə yerləşən dəniz mənzərəli ofisdə əsas konfrans zalının qarşısındakı divar unikal sənət nümunəsi ərsəyə gətirmək üçün gözəl şərait yaradır.
Layihə haqqında məlumat
Mövzu və üslub: Şirkət müxtəlif bədii üslublara açıqdır və yaradıcı, orijinal, yeni ideyaları alqışlayır.
Uyğunluq: Dəvət böyük miqyaslı sənət əsərləri yaratmaq qabiliyyətinə malik rəssamlar, muralistlər və sənət kollektivləri üçün açıqdır. Müraciət edənlər müəyyən edilmiş müddət ərzində işi başa çatdırmaq bacarığına və imkanına malik olmalıdırlar.
Məkan: Crescent Ofisləri
Divarın ölçüləri: Təxminən 40 metr uzunluğunda və 3 metr hündürlüyündə
Seçim prosesi
Qiymətləndirmə prosesi: Qiymətləndirmə meyarlarına ən uyğun olan təklifi seçmək məqsədilə üç üzvdən ibarət münsiflər heyəti tərəfindən bütün müraciətlər diqqətlə nəzərdən keçiriləcək. Şortlist olunmuş namizədlər müsahibəyə və ya öz konsepsiyasını daha ətraflı təqdim etmək üçün görüşə dəvət oluna bilərlər.
Qiymətləndirmə meyarları:
Bədiilik: Təklif olunan layihənin yaradıcılığı, orijinallığı və vizual təsiri.
Büdcə: Təklif olunan büdcənin həcmi, reallığı və layihənin keyfiyyətinə uyğunluğu.
Həyata keçirmə imkanı: Verilmiş məkan və zaman çərçivəsində layihənin icrasının mümkünlüyü və praktikliyi.
Mədəni həssaslıq: Azərbaycan irsi və mədəniyyətinin nəzərə alınması.
Vizual uyğunluq: Təklif olunan layihənin ofis mühiti və arxitekturasına uyğunluğu.
Müraciət prosesi
Tələb olunan sənədlər:
Müvafiq təcrübəni vurğulayan tərcümeyi-hal və ya CV
Təklif olunan divar rəsminin (mural) eskizi və ya ilkin vizual təsviri
Təklif olunan konsepsiyanın izahı
Təklif olunan ilkin büdcə (izahlı)
Müraciət, əlavə məlumat, ofis ziyarəti ilə bağlı suallar üçün elektron poçt ünvanı:
[email protected]
Müraciət üçün son tarix: 09.00, bazar ertəsi, 17 fevral 2025-ci il
