Yanvarın 22-də Gəncliyə Yardım Fondunda əmək qəhrəmanı, Prezident təqaüdçüsü Tərlan Musayevanın 70 illik yubileyi münasibətilə "Ulu Öndərin 'canlı əsəri' Tərlan" adlı kitabın təqdimatı təşkil olundu. Tədbir Mirvarid Dilbazi Poeziya Məclisi İctimai Birliyinin təşəbbüsü ilə baş tutdu və kitab Tərlan Musayevanın ömür yolunu, ictimai fəaliyyətini və zəhmətsevərliyini əks etdirir.
QHT.az xəbər verir ki, tədbirdə kitabın müəllifi, ədəbi təhlilçi və yazıçı Vaqif Osmanlı, redaktoru və Mirvarid Dilbazi Poeziya Məclisi İctimai Birliyinin rəhbəri Güllü Eldar Tomarlı, Milli Məclisin deputatı Razi Nurullayev, şəhid anası Sevil Hüseynova, Əməkdar Mədəniyyət işçisi Çimnaz Əliyeva, politoloq və yazıçı Reyhan Mirzəzadə, Vətən müharibəsi qazisi və şair Rafael Tağızadə, şəhid bacısı və şair Lalə İsmayıl, Brilyant Atəş, Arzu Yaqubqızı və başqaları çıxış edərək, Tərlan Musayevanın zəhmətinə və ictimai xidmətlərinə görə onu təbrik etdilər.
Tədbir iştirakçıları vurğuladılar ki, Tərlan Musayevanın fəaliyyəti gələcək nəsillər üçün nümunə olmalıdır. O, hələ gənc yaşlarından çalışdığı sahədə göstərdiyi fədakarlıqla seçilib və çox sayda mükafatlara layiq görülüb. 17 yaşında orta məktəbi əla qiymətlərlə bitirib ali təhsil yerinə peşə məktəbini seçən Musayevanın həyatı, həmçinin, 18 yaşında pambıq tarlasında "dəmir at"ın sükanı arxasında başlamış, 21 yaşında isə bir neçə mükafata layiq görülmüşdür. O, 23 yaşında SSRİ Ali Sovetində Azərbaycanın 9 rayonunu təmsil edən ən gənc deputat olub.
"Ulu Öndərin 'canlı əsəri' Tərlan" kitabı, Tərlan Musayevanın zəhmət yolu və həyatının yalnız bugünkü deyil, həm də gələcək nəsillər üçün əhəmiyyətini açıq şəkildə göstərir. Kitabda həmçinin, onun şəxsi həyatı, mənəvi dünyası və Vətənə olan sevgisi əks olunur. Müəllif, Musayevanın şəxsiyyətini və həyatını daha dərindən araşdıraraq, bu əsərdə onun haqqında yazılan ədəbiyyatları və müsahibələri bir araya gətirərək onun müxtəlif tərəflərini təqdim edir.
Təqdimat mərasimində Tərlan Musayeva, kitabın ərsəyə gəlməsində əməyi keçən hər kəsə təşəkkür edib və tədbir iştirakçılarına minnətdarlığını bildirib. O, Ulu Öndər Heydər Əliyevin ona göstərdiyi diqqət və qayğını xatırlayaraq, qazandığı bütün uğurlara görə özünü Ümummilli Liderə borclu bildiyini qeyd edib. Yubilyar, gəncləri zəhmətdən qorxmamağa və əməksevər olmağa çağırıb, bu yolda çəkilən zəhmətin mütləq qarşılığını verəcəyinə əminliyini ifadə edib.
Tədbirin sonunda, kitab müəllifin imzası ilə iştirakçılara təqdim olundu.
