Məlum olduğu kimi, amerikalı iş adamı İlon Maskın Donald Trampın andiçmə mərasimində çıxışı zamanı kütləyə verdiyi salam “nasist salamı”na bənzədilib və sosial mediada əks reaksiyalara səbəb olub.
“AzPolitika” xəbər verir ki, Maskın bu hərəkəti bütün dünya mediasında müzakirə predmetinə çevrilsə də, İsrail Baş naziri Benyamin Netanyahu gözlənilənin əksinə buna soyuqqanlı münasibət göstərib.
Netanyahu “X” hesabından etdiyi paylaşımda Maskın “İsrailin böyük dostu” olduğunu deyib.
Maskın İsrailə 2023-cü il oktyabrın 7-dən sonra səfər etdiyini xatırladan Netanyahu hər zaman İsraili dəstəklədiyi üçün Maska təşəkkür edib.
Xatırladaq ki, Vaşinqtondakı “Capital One Arena” idman arenasında keçirilən andiçmə mərasimində çıxış edən milyarder seçkidəki qələbə münasibətilə Trampl təbrik edib və ona təşəkkürünü bildirib. Mask çıxışını yekunlaşdıran zaman isə əlini havaya doğru qaldıraraq “qəlbim səninlədir” deyə qışqırıb.Maskın Tramp tərəfdarlarına jesti nasist salamına bənzədildiyi üçün böyük müzakirə mövzusuna çevrilib. Bir çox sosial şəbəkə istifadəçisi Maskı nasist salamı verməkdə ittiham edib və onun bu hərəkətini pisləyib.
“AzPolitika.info”
