“Turan Tovuz”un baş məşqçisi Kurban Berdıyev Misli Premyer Liqasının 20-ci turunda “Qarabağ”a qarşı keçirdikləri oyun haqda danışıb.
QOL.az komanda.az saytına istinadən xəbər verir ki, o, komandasının 2:1 hesablı qələbəni belə şərh edib:
“Uşaqlara təşəkkür edirəm ki, ağır ev məğlubiyyətindən sonra bu cür mübarizə apardılar. Uduzduqları anda belə, göstərdilər ki, hər şeyi dəyişə bilər. Çox şükür ki, belə imkan bizim əlimizə düşdü və qələbə çaldıq. Futbolçuların hər biri ilə fərdi söhbət aparıldı və bu oyuna digər oyuna yanaşdıqları kimi yanaşmamalı olduqları söyləndi. Futbolçularım məni dinlədi”.
K.Berdıyev deyib ki, “Kəpəz”lə keçirdikləri son oyun ən pis oyunları idi: “Yanaşma fərqli idi və biz yanaşmanın üzərində işlədik. Biz istər müdafiədə, istərsə də hücumda standartlar üzərində işləyirik. Təəssüf ki, keçən oyunda biz bu standartlara ciddi yanaşmadıq”.
K.Berdıyev bugünkü rəqibləri “Qarabağ” və onun baş məşqçisi Qurban Qurbanov barədə müsbət fikirlər səsləndirib.
“Qurban Qurbanov kimi güclü məşqçinin çox az zəif nöqtəsi olur. Belə oyunlarda Allah bizə yardım edir. “Qarabağ” Azərbaycan futbolunun flaqmanı, Qurban Qurbanov isə ən güclü məşqçilərindən biridir” - deyə Berdıyev bildirib.
