Son zamanlar get-gedə sayları çoxalan dietoloqların sosial şəbəkələrdəki marafonlarının tez-tez şahidi oluruq.
Hətta 2 manata belə marafona qoşan dietoloqlar var. Onlar “Facebook”, “İnstagram”, “Whatsap” qrupları, “Telegram” kanallarında qruplar yaradaraq insanlara pəhriz menyuları verirlər.
Halbuki verilən pəhriz menyuları hər şəxsə özəl olmalıdır. Belə ki, müraciət edən şəxslər analiz verməli, bədən kütlə indeksi hesablanmalı, orqanizmdə olan hər hansı problem nəzərə alınmalıdır.
Ümumiyyətlə, Azərbaycanda dietoloq ixtisası üzrə ali tibb təhsili varmı?
Mövzu ilə bağlı “Cebheinfo.az”-ın sorğusuna cavab olaraq Azərbaycan Tibb Universitetinin (ATU) mətbuat xidmətinin rəhbəri Günel Aslanova bildirib ki, sözügedən ali təhsil müəssisəsində hazırda dietologiya ixtisası yoxdur.
“Hazırda Azərbaycan Tibb Universitetində nə bakalavriatda, nə rezidentura təhsil pillələri üzrə dietologiya ixtisası var. Amma gələn ildən artıq bakalavriatda və magistraturada “Qidalanma və dietologiya” ixtisası olacaq”.
