“Xetafe”nin baş məşqçisi, ispan mütəxəssis Xose Bordalas İspaniya La Liqasında yanvar ayının ən yaxşı məşqçisi seçilib.
Arena.az bu barədə İspaniya La Liqasının rəsmi saytına istinadən məlumat verir.
Yanvar ayında Bordalasın çalışdırdığı “Xetafe” La Liqada üç oyun keçirib, iki qələbə qazanıb, bir heç-heçə edib. Belə ki, sözügedən komanda “Las Palmas”ı (2:1) və “Real Sosyedad”ı (3:0) məğlub edib, “Barselona” ilə isə heç-heçə (1:1) oynayıb.
Mükafat uğrunda mübarizədə Bordalas “Leqanes”in ispan baş məşqçisi Borxa Ximenesi və “Real”ın italyan baş məşqçisi Karlo Ançelottini üstələyib.
21 oyundan 23 xalla “Xetafe” İspaniya La Liqasının yarış cədvəlinin 14-cü pilləsində qərarlaşıb.
Xatırladaq ki, Bordalas karyerası ərzində ilk dəfə La Liqada ayın ən yaxşı məşqçisi seçilir. Cari mövsümün geridə qalmış aylarında fərqlənən məşqçilər isə bunlardır:
Avqust 2024 – Hansi Flik (Barselona)
Sentyabr 2024 – Ernesto Valverde (Atletik)
Oktyabr 2024 – Hansi Flik (Barselona)
Noyabr 2024 – Miçel (Jirona)
Dekabr 2024 – Dieqo Simeone (Atletiko)
Xose Bordalas 2023-cü ilin aprel ayından “Xetafe”yə rəhbərlik edir. O, bu komandanı bütövlükdə 74 oyuna çıxarıb. Komanda bu görüşlərdə 25 qələbə qazanıb, 23 heç-heçə edib, 26 məğlubiyyətə üzülüb. Top fərqi isə belədir – 88:79.
60 yaşlı ispaniyalı mütəxəssis “Xetafe”dən öncə “Valensiya”, “Alaves”, “Alkorkon”, “Elçe”, “Alkoyano”, “Herkules”, “Alikante”, “Novelda”, “Eldense”, “Benidorm” kimi klublarda da çalışıb. Xose Bordalasın məşqçi karyerasındakı ən böyük uğuru “Alaves”lə İspaniya İkinci Liqasının çempionluğunu bayram etməsidir.
