“Uzbekistan Airways” aviaşirkəti Avropaya uçuşlarında Rusiya ərazisi üzərindən keçidlərdən imtina edib.
“İki sahil” Özbəkistan KİV-ə istinadla xəbər verir ki, bu barədə şirkətin idarə heyətinin sədri Şuxrat Xudaykulov bildirib.
Qərar Avropa Aviasiya Təhlükəsizliyi Agentliyinin (EASA) Rusiyanın Avropa hissəsi üzərindən uçuşları təhlükəli kimi qiymətləndirən hesabatına əsasən qəbul edilib. Yeni uçuş marşrutları Azərbaycan və Türkiyə üzərindən təşkil olunub.
Şirkət rəhbərinin sözlərinə görə, marşrutların dəyişdirilməsi uçuş müddətini 30-40 dəqiqə uzatsa və əlavə xərc yaratsa da, bu vəziyyət fors-major hesab edilir: "Buna görə də sərnişinlər üçün tariflər artırılmayacaq".
Bundan əvvəl, Azərbaycan Hava Yollarına (AZAL) məxsus Bakı-Qroznı aviareysini yerinə yetirən sərnişin təyyarəsinin qəzasından sonra Özbəkistanda vəziyyətin təhlili üçün Baş nazirin rəhbərliyi altında xüsusi komissiya yaradılıb. Komissiyanın tərkibinə Müdafiə Nazirliyi, Nəqliyyat Nazirliyi və digər qurumların nümayəndələri daxil edilib.