Əfqan üləması (din alimləri) Kabildə “Əfqanıstan xalqları arasında sülh və tolerantlıq” mövzusunda keçirilən elmi seminarda ölkə hakimiyyətini inklüziv hökumət yaratmağa və qızlar üçün məktəblər açmağa çağırıb.
NOCOMMENT.az xəbər verir ki, bu barədə “Tolo news” xəbər portalı məlumat yayıb.
İslami Dəyərlərin Qorunması və Cihad Üləma Şurasının sədri Əbdülqadir Kanat İslam cəmiyyətinin ehtiyac duyduğu biliklərə yiyələnmənin müsəlmanların vəzifəsi olduğunu deyib. Söhbət mamalıq, tibb və qadınlar üçün lazım olan digər fənlərdən gedir.
Üləma Əbdül Həsən öz növbəsində qeyd edib ki, Əfqanıstan xalqına hakimiyyətin real təhvil verilməsi onun bütün sakinlərinin ölkədə öz yerini və orada iştirakını görməsi üçün zəruridir. Onun sözlərinə görə, bu, Əfqanıstanın əsaslarını gücləndirəcək.
İlahiyyatçılar həmçinin əfqan qadınlarını cəmiyyətdə baş verən pozuntulara biganə qalmamağa və öz hüquqlarını müdafiə etməyə, İslami dəyər və inancları uğrunda mübarizə aparmağa çağırıblar.
