Yanvarın 24-də Azərbaycan Kinematoqrafçılar İttifaqının təşəbbüsü iləkino tənqidçiləri və kinoşünasların görüşü olub.
Kulis.az xəbər verir ki, görüşdə Azərbaycan kinoşünaslığının hazırkı vəziyyəti, problemləri və perspektivləri müzakirə olunub. ADMİU-nun dosenti Nadir Bədəlov, kinotənqidçilər Aliyə Dadaşova, Aygün Aslanlı, Nəzrin Mahu, İlqar Quliyev, Ülvi Mehdi, Hacı Səfərov, kinoşünaslar Toğrul Abbasov, Şəhla Əmirli, Sevinc Elsevər, kinoinfo.az saytının redaktoru Ramil Ələkbərov və Azərbaycan Kinematoqrafçılar İttifaqının katibləri Oleq Səfərəliyev, Əli İsa Cabbarovun iştirakı ilə baş tutan görüşdə kino tənqidinin rolunu genişləndirmək, kinomuzun nəzəri bazasını gücləndirmək məqsədilə bir sıra addımların həyata keçirilməsi məqsədəuyğun sayılıb.
Xüsusilə kinotənqidçilərin təşkilatlanması, mükafatının təsis edilməsi kinomuzun inkişafına dəstək verə biləcək addımlar kimi qeyd olunub. AKİ katibi Əli İsa Cabbarov kino nəzəriyyəsi ənənəsinin formalaşmamasını kinomuzun inkişafına mane olan amil kimi qeyd edib, kinomuzun haradan gəldiyi və hara getdiyi sualına cavab verməyi kinoşünaslarımız qarşısında duran əsas məqsədlərdən biri saydığını bildirib. AKİ katibi Oleq Səfərəliyev kinoşünasların mükafatının nominasiyaları ilə bağlı təkliflərini verib, bu fəaliyyətin müstəqilliyinin vacib faktor olduğunu bildirib: “Kinoşünaslarımızn müstəqilliyi onların nüfuzunun qarantı ola bilər”.
İşügüzar görüşün qərarları və nəticələri barədə əlavə məlumat veriləcək.
