Vətən müharibəsi şəhidinin doğum günündə xatirəsi yad edildi

Cənub regionu üzrə bölgə müxbiri Bəhruz Əliyevin verdiyi məlumata görə, ziyarətdə YAP Biləsuvar rayon təşkilatının sədri Kamil Qurbanlı, QMƏVŞAİB Biləsuvar rayon filialının sədri Bəhruz Əliyev, şəhid valideyinləri və ictimaiyyət nümayəndələri iştirak ediblər. Ziyarət zamanı qəhrəman şəhidimizin şərəfli döyüş yolundan söz açılaraq xatirəsi yad edilmiş, ruhuna dualar oxunmuş və valideyininə baş sağlığı verilmişdir.

Azərbaycan Ordusunun çavuşu olmuş şəhid Əhmədli Elməddin Gülverən oğlu 28 yanvar 1996-cı ildə Biləsuvar rayonunun Təzəkənd kəndində anadan olmuşdur. 2002-2013-cü illərdə R.Şirinov adına Təzəkənd kənd tam orta məktəbində təhsil almış və 2013-2014-cü illərdə müddətli həqiqi hərbi xidmətdə olmuşdur. Azərbaycan Respublikasının ərazi bütövlüyü uğrunda 27 sentyabr 2020-ci il tarixindən başlayan Vətən müharibəsində iştirak etmiş, Xocavəndin azadlığı uğrunda gedən döyüşlərdə şücaət göstərmiş və noyabrın 3-də Hadrut istiqamətində gedən döyüşlərdə düşmən hücumunun qarşısını alarkən qəhrəmancasına şəhid olmuşdur. 19 noyabr 2020-ci ildə Təzəkənd kənd qəbristanlığında dəfn olunmuşdur. Azərbaycan Respublikası Prezidentinin müvafiq sərəncamlarına əsasən şəhid Əhmədli Elməddin Gülverən oğlu ölümündən sonra 3-cü dərəcəli “Vətənə xidmətə görə” ordeni, “Vətən uğrunda” və “Xocavəndin azad olunmasına görə” medalları ilə təltif edilib.

Allah şəhidlərimizə rəhmət eləsin!