Futbol üzrə UEFA Çempionlar Liqasının Liqa mərhələsinin 8-ci turu “İnter”in hücumçusu Lautaro Martines üçün əlamtdar olub.
Arena.az xəbər verir ki, argentinalı futbolçu Fransa təmsilçisi “Monako”ya 3:0 hesabıyla qalib gəldikləri oyunda yeni uğura imza atıb.
Belə ki, 27 yaşlı hücumçu buna “Monako” ilə görüşdə het-trik etməklə nail olub. Argentinalı forvard Milan təmsilçisinin heyətində qitənin bir nömrəli klub turnirində 17-ci qolunu vurub. O, bu göstəricidə “İnter”in ÇL-dəki bombardiri Sandro Matsolaya çatıb.
Bundan əlavə, Martines Samuel Etodan sonra UEFA Çempionlar Liqası oyununda “İnter”in heyətində het-trik edən ikinci oyunçudur. Kamerunlu hücumçu 2010-cu ildə Almaniyanın “Verder” klubu ilə görüşdə rəqib qapısından üç top keçirmişdi.
Xatırladaq ki, Lautaro Martines 2018-ci ilin iyulundan “İnter”də çıxış edir. İtaliya nəhəngi argentinalı hücumçunu 25 milyon avro məbləğ müqabilində Avelyaneda “Rasinq”indən “neradzurri”nin heyətinə qatıb.
Martinesin “İnter”lə müqaviləsinin müddəti 2029-cu ilin iyun ayının sonuna qədər qüvvədədir. 2024-cü ilin yayında Martinesə “İnter”in kapitan sarğısı həvalə edilib.
Argentinalı hücumçu cari mövsümdə bütün yarışlarda “İnter”in heyətində 30 oyuna çıxıb, 15 qol vurub, 6 məhsuldar ötürmə verib.
Lautaronun “neradzurri”nin heyətində çıxışının ümumi mənzərisi isə belədir: 312 oyun, 144 qol, 49 məhsuldar ötürmə.
Martines “neradzurri” ilə 2 dəfə İtaliya A Seriyasını, 2 dəfə İtaliya Kubokunu və 3 dəfə də İtaliya Super Kubokunu qazanıb, ötən 2022/2023-cü illər mövsümündə isə UEFA Çempionlar Liqasının finalçısı olub.
Lautaro Martines 2018-ci ilin martında debüt etdiyi Argentina yığmasının heyətində 70 oyuna çıxıb, 32 qol vurub, 9 məhsuldar ötürmə verib. Hücumçu 2021-ci və 2024-cü illərdə Amerika
Kubokunun, 2022-ci ildə Qətərdə keçirilmiş dünya çempionatının, həmçinin 2022-ci il Çempionların CONMEBOL-UEFA Kuboku çərçivəsində “Finalissima” oyununun qalibi olub.
“Transfermarkt” internet-portalı 27 yaşlı argentinalı mərkəz hücumçusunun transfer dəyərini 100 milyon avro məbləğində qiymətləndirir.
