Fransanın "Lion" klubunun yeni baş məşqçisi müəyyənləşib.
Teleqraf.com klubun rəsmi saytına istinadən xəbər verir ki, bu posta İtaliyanın "Milan" klubunun sabiq baş məşqçisi Paulo Fonseka təyin olunub.
Portuqaliyalı mütəxəssis daha əvvəl istefaya göndərilmiş Pyer Sajı əvəzləyib. "Lion" 52 yaşlı məşqçi ilə 2027-ci ilin yayına kimi nəzərdə tutulan müqavilə bağlayıb.
“Paulo Fonseka və köməkçilərinin qarşısına mövsümün ikinci yarısında klubu yüksək səviyyəyə çatdırmaq, həmçinin növbəti mövsüm UEFA Çempionlar Liqasında iştirak kimi əsas məqsədə nail olmaq vəzifəsi qoyulub”, - deyə Fransa təmsilçisi bəyanat yayıb.
Qeyd edək ki, Paulo Fonseka 2024-cü ilin iyunundan dekabr ayına kimi "Milan"ı çalışdırıb. Bundan əvvəl o, vətənində "Aveş", "Portu", "Braqa", "Paços de Ferreyra", Ukraynada "Şaxtyor", Fransada "Lill" və İtaliyada "Roma" klublarının da baş məşqşisi olub.
