Bilbao “Atletik”inin baş məşqçisi Ernesto Valverde Avropa Liqasının 1/8 finalının “Roma” ilə cavab oyununu şərh edib.
Arena.az məlumat verir ki, səfərdəki ilk oyunda 1:2 hesabı ilə məğlub olmuş “Atletik”, doğma meydanda baş tutmuş cavab oyununda 3:1 hesablı qələbə sayəsində cütün qalibi olaraq növbəti mərhələyə adlayıb.
Valverde matçdan sonra keçirilmiş mətbuat konfransında bunları söyləyib:
“Elə oyunlar var ki, burada sizin aparıcı oyunçularınız özlərini göstərməlidirlər. Bizim belə oyunçularımız var, bu isə vacibdir. Niko Uilyams məsuliyyəti hiss edir və ilk dəqiqədən çalışırdı. O, iki qol vurdu – onlardan biri fasilə ərəfəsində həll edici idi.
Siz say çoxluğuna malik olduqda, müvafiq üstünlükdən necə yararlanmağı bilməlisiniz. Bizə çoxsaylı asmalar etmək gərək olurdu, biz fəal surətdə irəli gedirdik və məqamlar yaradırdıq. Əvvəlcə Niko dirəyi nişan aldı, ardınca Maroan Sannadi fürsətlər qazandı, sonra isə hər şey yaxşı getdi və biz qələbəmizi qazandıq”, – UEFA-nın rəsmi saytı ispan mütəxəssisdən sitat gətirir.
Yarışın 1/4 finalına vəsiqə qazanmış Bilbao “Atletik”i bu mərhələdə “Reyncers”lə qarşılaşacaq. “Roma” isə cari avrokubok mövsümündə iştirakını başa vurub.
