Son zamanlar “Anksiyete pozuntusu ” yaşayan insanların sayı artmaqdadır.
Bioloji meyillilik, öyrənilmiş davranışlar və interpersonal problemlər anksiyetenin səbəbləri arasındadır. Xüsusilə ərgənlik öncəsi travmatik yaşantılar və disfunksional ailədə böyümək anksiyete pozuntularının inkişafına səbəb ola bilər.
Bununla bağlı NOCOMMENT.az-a müsahibə verən Müdafiə Nazirliyinin Baş Klinik Hospitalın həkim psixiatrı Zaur Qasımov son zamanlar bir çox insanda rast gəlinən “Anksiyete pozuntusu” barədə danışıb.
“Bəzən insanlar daxili narahatlıq, gərginlik hiss edirlər. Səbəbsiz yaranan bu daxili narahatlıq, gərginlik insanlara həyacan və təşviş hissi verir. Bu hal həmçinin, tənəffüsün artmasına səbəb ola bilər. Belə insanlar bədənin sol tərəfdən yuxarı hissəsində, yaxud sol qolunda uyuşma və boğazlarında nə isə qalmış kimi hiss edirlər. Udqunmağın çətinləşməsi kimi narahatlıqlar olur. Belə insanlar sanki, nə isə olacaq kimi gözləntidə qalırlar. Bu halları generalizə olunmuş təşviş pozuntusu, yaxud da anksiyete pozuntusu kimi düşünmək olar. Belə hallarda şəxslərin psixiatra müraciət etmələri tövsiyyə olunur”,- deyə həkim psixiatr qeyd edib.
