Futbol anlayışı meydandakı oyunla məhdudlaşmır, həm də onun ətrafında qurulan ünsiyyət, azarkeşlər və media ilə münasibətlər də böyük əhəmiyyət daşıyır. Uğurlu komandalar yalnız taktika və oyun üslubu ilə deyil, həm də açıq kommunikasiya və hesabatlılıq prinsipləri ilə fərqlənir. Lakin son illərdə Azərbaycan futbolunda fərqli bir mənzərə formalaşıb: məşqçilər uğursuz nəticələrin izahını vermək əvəzinə, diqqəti yayındırmağa, jurnalistləri günahlandırmağa və ya suallardan qaçmağa çalışırlar.
Birincisi, sual ittiham deyil. Medianın işi, mətbuat konfransının mahiyyəti sual-cavabdır. Sual veriləcək, cavab verə bilirsənsə, verəcəksən ya da susmaq, cavablandırmamaq hüququndan istifadə edəcəksən. Hətta bununla bağlı “Pro” kateqoriyalı məşqçi kurslarında dərslər keçirilir. Görünən odur ki, bəzi məşqçilərimizə həmin dərslərdə “qayıb” qoyulub. Məsələn, Samir Abasov nadir məşqçilərimizdəndir ki, günahı həmişə kənarda axtarıb. Gah azarkeş günahkar olur, gah futbolçu, gah da jurnalistlər. Bu vaxta qədər eşitmisinizmi Abbasov desin ki, filan məğlubiyyətə görə, filan xal itkisinə görə səhv məndə olub? Dünən “Səbail”lə qarşılaşmadan qalib ayrılan “Neftçi” (2:1) çempionatda nəzəri şanslarını, kubokda isə avrokubok ümidini saxlayır. Çətin olsa da, mümkünsüz deyil. Elə bu dəmdə “avrokuboka vəsiqə qazanmasanız, istefa verəcəksinizmi?” sualının yeridir. Niyə də soruşmayaq?
“Neftçi” kimi klubun avrokuboklardan kənarda qalması faciədir. Bunu azarkeş də bilir, jurnalist də. Sanki Samir bəy bütün bunların fərqində deyil. Jurnalistin sualının arxasında qaranlıq məqamı görməyi bacaran baş məşqçi, 9 tur sonra olacaqları niyə görmür?
Hər ay ən azı 30-40 min manat məvacib alan məşqçidən “maaşınızı hara xərcləyirsiniz?” soruşmaq ayıb olar, amma “bu qədər pulu niyə və hansı nəticəyə görə haqq edirsiniz?” sualını vermək peşəkarlığın əslidir. Dünən həmkarımız da bu sualı ən yumşaq formada verib. Yaxşı da edib.
“Neftçi” böyük klubdur. Məşqçisi də böyük olmalıdır. Hər addımı nümunə olmalı, hər qələbəsi dərsliklərə salınmalıdır. Yaxşı olar ki, Abasov qaranlıq otaqda qara pişik axtarmaqdansa, Avropaya boylansın. Həmkarları Xosep Qvardiolanın, Arne Slotun və sairlərinin mətbuat konfranslarında suallar önündə necə tər tökmələrinə baxsın, öyrənsin.
Böyümək lazımdır...
Əli Sahib
