Demans, beyindəki hüceyrə ölümü ilə irəliləyən və yalnız yaddaş itkisi ilə məhdudlaşmayan bir xəstəlikdir. Bu xəstəlik həmçinin şəxsiyyəti, duyğuları və davranışları dəyişdirə bilər.
E-saglam.az xəbər verir ki, demansın yalnız yaşlılara deyil, gənclərə də təsir edə biləcəyini unutmamalıyıq. Xüsusilə irsi neyrodegenerativ demans hallarında, bir neçə ailə üzvü arasında görülərsə, bu xəstəlik erkən yaşlarda da ortaya çıxa bilər.
Demansın ilk mərhələlərində psixiatrik tapıntılar, şəxsiyyət dəyişikliyi kimi problemlər baş verə bilər. Bu vəziyyət, xəstənin yaxınları üçün çətin ola bilər. Xəstəlik irəlilədikcə, fərdin şəxsiyyətində ciddi dəyişikliklər müşahidə olunur. Alzheimer xəstəliyi demansın ən çox rastlanan növüdür və damar tıxanması, beyində maddə yığılması kimi faktorlar da xəstəliyə səbəb ola bilər.
Mütəxəssislər, xəstəliyi tamamilə aradan qaldıra bilməsək də, müalicə ilə xəstələrin və yaxınlarının həyat keyfiyyətini artıra biləcəyini bildirir. Fiziki müalicə, qidalanma, yuxu rejimi və davranış pozğunluqlarının idarə edilməsi, prosesi ləngitmək üçün önəmlidir. Demansın inkişafını ləngitmək və riskini azaltmaq üçün ürək-damar xəstəliklərinin erkən müalicəsi, şəkərli diabetin nəzarət altına alınması, aktiv sosial həyat və sağlam qidalanma vərdişlərinin qazanılması vacibdir. Eşitmə və görmə problemləri də erkən müalicə edilməlidir.
Tərcümə: Könül Oruc
