Moris Ravelin 150 illiyi yubileyinə həsr olunmuş konsert-konfrans keçirilib

Üzeyir Hacıbəyli adına Bakı Musiqi Akademiyasının Qara Qarayev adına Konfrans zalında görkəmli fransız bəstəkarı Moris Ravelin 150 illiyi yubileyinə həsr olunmuş konsert-konfrans keçirilib. Tədbir BMA-nın Musiqi nəzəriyyəsi kafedrası tərəfindən təşkil olunub.

Musiqi impressionizminin görkəmli ustadlarından birinin yubileyi münasibətilə hazırlanan maraqlı proqram çərçivəsində tamaşaçılar Ravelin kamera-vokal və kamera-instrumental yaradıcılığının parlaq nümunələrindən zövq almaq, bəstəkarın yaradıcılıq xüsusiyyətləri, musiqi üslubu, fransız maestro Ravelin şəxsiyyətinin unikal cəhətləri ilə daha yaxından tanış olmaq imkanı əldə ediblər. Həmçinin tədbir zamanı bəstəkarın həyat və yaradıcılığı ilə bağlı tarixi sənədli xronikanın və arxiv fotoşəkillərinin nümayişi keçirilib.

Bayram konsert proqramı Azərbaycanın Əməkdar artisti Aleksey Mıltıx, beynəlxalq müsabiqələr laureatları - Azərbaycan Dövlət Akademik Musiqili Teatrının solisti Yuliya Heydərova, BMA-nın dosenti Nərgiz Salmanlı, BMA-nın müəllimi Nərgiz Kəngərli, Prezident təqaüdçüsü Səbinə Quliyeva və sənətşünaslıq üzrə fəlsəfə doktoru, BMA-nın baş müəllimi Alyona İnyakinanın ifasında təqdim olunub.

Bundan əlavə, tamaşaçılara Antalya Dövlət Konservatoriyasının Akdeniz Universitetinin dosenti Yuri Sayutkinin ifasında Ravelin 2 nömrəli konsertinin videoyazısı nümayiş etdirilib.

Görkəmli fransız bəstəkarının həyat və yaradıcılığına dair maraqlı faktlarla bağlı məruzə və təqdimatlarla BMA-nın tarix-nəzəriyyə fakültəsinin tələbələri - Nazrin Məmmədova, Ayşən Rəfizadə, Dürnisə Hüseynova, Amina Məmmədova, Züleyxa Murtuzova, Jale Quliyeva, Pakizə Mustafazadə, Rəhimə Həmidova və Ayan İmanlı çıxış ediblər.

Layihənin kuratoru - Alyona İnyakina.

İnformasiya dəstəyi - Trend.Az, Day.Az, Milli.Az