Mövzunu Olaylar.az-a şərh edən Ədalət, Hüquq, Demokratiya (ƏHD) Partiyasının İdarə Heyətinin üzvü, politoloq Əli Zülfüqaroğlu bildirib ki, Trampın hakimiyyətə gəlməsi Cənubi Qafqazda güc balansını dəyişdirir, Ermənistanın himayədarlarını zəiflədir və Azərbaycanın mövqeyini daha da gücləndirir. Bu proseslər isə Ermənistanı qorxuya salır:
"Trampın hakimiyyətə gəlməsi dünyada geosiyasi prosesləri tamamilə dəyişib və yaxın perspektiv üçün dəyişim prosesinin daha dərin məcraya qədəm qoyacağını söyləmək mümkündür. Təbii ki, bütün bölgələrlə yanaşı, Cənubi Qafqaz da bu prosesə təsirsiz ötüşmür. Ona görə də Paşinyan növbəti mərhələdə Ermənistanın çətin durumla üzləşəcəyini və eyni zamanda himayədarları ilə bağlı məsələlərin arxa plana keçəcəyini bilir. Vaşinqtonla Avropa İttifaqı arasında ziddiyyətlərin dərinləşməsi və Rusiya ilə Birləşmiş Ştatlar arasında münasibətlərin normallaşması prosesinin ilkin mərhələsindən etibarən böyük ehtimalla Tramp, Fransa başda olmaqla Avropa İttifaqına ciddi təzyiqlər göstərəcək. Bu da onu deməyə əsas verir ki, Avropa əsasən də Fransanın Ermənistana himayədarlıq missiyası arxa plana keçəcək. Bu, Ermənistan üçün ciddi problemlərə səbəb ola bilər. Çünki Ermənistan sülh prosesini uzatmaqla, hansısa uzaq perspektivə hesablanan geosiyasi revanşist niyyətlərini həyata keçirmək üçün geosiyasi zəminin yaranmasını ümid edirdi. Buna görə də Azərbaycanla sülh prosesini yubatmağa çalışırdı. İndiki məqamda isə Azərbaycanın tələbləri və eyni zamanda proseslər fonunda mövqeləri daha da güclənir. Təbii ki, bunun arxasında aparılan düşünülmüş strateji diplomatik fəaliyyət dayanır və Ermənistanda, xüsusilə Avropa İttifaqı müşahidə missiyasının Azərbaycan tərk etməsi ilə bağlı tələblərinə qarşı çıxmamaq görüntüsü yaradırdı və bununla bağlı bir sıra açıqlamaların şahidi olmuşduq. Amma buna paralel olaraq Ermənistanın sürətlə silahlanması və verilən açıqlamalara və sülh prosesinə uyğun olmayan fəaliyyətinin yürüdüldüyünün şahidi olduq. Təxribatlar da böyük ölçüdə bundan qaynaqlanır və Ermənistan bununla sübut etməyə çalışır ki, əslində Avropa İttifaqı müşahidə missiyasının bölgədə fəaliyyəti vacib şərtdir. Dırnaqarası guya Azərbaycan Ermənistana təzyiq xarakterli siyasətini yürüdür və xüsusilə hərbi formada bu hərbi sahədə bu istiqamət var və Ermənistan o görüntünü yaradır ki, Azərbaycanın Ermənistana hərbi təzyiqlərinin qarşısını almaq üçüb vasitəçilərə ehtiyac yaranır. Xüsusilə Avropa İttifaqı başda olmaq şərti ilə. Ona görə də, Ermənistan gözlənildiyi kimi, bu cür təxribatlara yol verməklə bu fikirlərini açıqlamalarını əsaslandırmağa çalışır. Hesab edirəm ki, Ermənistan indiyə qədər yürütdüyü siyasət və hərbi istiqamətdə xüsusilə hücum silahlarını əldə etməyə çalışması və intensiv olaraq bu fəaliyyəti yürütməsinin arxasında məhz bu planlar var və Ermənistanın törətdiyi Təxribatlar da hesab edirəm ki, bunu birmənalı olaraq sübut edir".
Səidə Ramazanova
