Avropa ölkələrinin liderləri Rusiya və ABŞ prezidentləri Vladimir Putinlə Donald Trampın telefon danışığını səbirsizliklə gözləyirlər. Çünki həmin telefon danışığının nəticələri Avropa qitəsinin təhlükəsizliyi üçün sarsıdıcı ola bilər.
Modern.az-ın məlumatına görə, bu barədə Almaniyanın “Bild” qəzeti yazıb.
Nəşrin məlumatına görə, Trampla Putin arasında telefon danışığı çərşənbə axşamı baş tutacaq. Onlar Ukraynanın və ola bilsin ki, Avropanın gələcəyini müzakirə edəcəklər. Və bu o deməkdir ki, həmin telefon danışığının nəticələri Avropa qitəsinin təhlükəsizlik sistemi üçün dağıdıcı ola bilər.
Məqalədə qeyd olunur ki, hazırda Avropanın siyasi elitaları arasında həyəcanlı əhval-ruhiyyə hökm sürür. Amma müəyyən bir eyforiya da var.
Kiyev qorxur ki, Tramp Rusiya qoşunlarının hələ də nəzarət etmədiyi Ukrayna ərazilərini Rusiyaya verməyə razı olacaq.
Finlandiya, Estoniya, Latviya və Litvada, eləcə də Polşada qorxurlar ki, Amerika tərəfi öz qoşunlarını Avropadan çıxaracaq və bir neçə ildən sonra rus qoşunları oraları fəth edəcək. Məhz buna görə də həmin ölkələr son həftələrdə Piyadalara Qarşı Minaların Qadağası Konvensiyasından çıxmağa hazır olduqlarını bəyan ediblər.
Paris və London da ən pis ssenariyə hazırlaşır. Burada Moskvanın etirazına baxmayaraq, Ukraynaya sülhməramlılar göndərməyə hazırlaşırlar. Tramp Ukraynanı taleyin ümidinə buraxmaq qərarına gəlsə, nüfuzlu Avropa ölkələri məsələyə müdaxilə etmək məcburiyyətində qalacaq.
Xatırladaq ki, həm Moskva, həm də Vaşinqton telefon danışığının baş tutacağını və hazırda son hazırlıqların getdiyini təsdiqləyib.
Putinlə Tramp arasında söhbət bu gün Moskva vaxtı ilə saat 16:00-18:00-a planlaşdırılıb.
