Mövzu ilə bağlı politoloq İlyas Hüseynov Olaylar.az-a açıqlamasında qeyd edib ki, Ermənistan ikili oyun oynayır və bu, onun sonu ola bilər:
"Azərbaycanla Ermənistan arasında sülh müqaviləsinin mətni ilə bağlı danışıqlar yekunlaşdıqdan sonra bizim mövqelərimiz Ermənistan tərəfindən atəşə tutulur və bu da tamamilə qəbulolunmazdır. Regionda təhlükəsizlik riskləri artır, güclənir və elə görünür ki, Ermənistan ikili oyun oynayır, bir tərəfdən sülhə sadiq olduğunu göstərir, əvvəlki dövrlərdə olduğu kimi sülh müqaviləsinin imzalanmasının bir addımlığında olduğunu dünyaya nümayiş etdirməyə çalışır. Eyni zamanda sürətlə silahlanır, müxtəlif mənbələrdən silah tədarükü həyata keçirilir, ordusunun təlimləri icra olunur. Ermənistan ordusunun zabitləri müxtəlif hərbi akademiyalarda təhsil alırlar. Ermənistanın dövlət büdcəsindən hərbi və təhlükəsizlik xərcləri də dəfələrlə artırılır. Müxtəlif fondlar, ianələr vasitəsilə demokratik institutların inkişafı adı ilə ayrılan vəsait də orduya yönəldilir və sülhpərvər bir Ermənistan obrazı yaradılır. Əksinə, Azərbaycana qarşı sülhü pozan, gərginliyin daim axtarışında olan Ermənistan ərazisinə təcavüz etməyə hazırlaşan bir dövlət obrazı demonlaşdırılır. Bu, tamamilə qəbulolunmazdır. Azərbaycanın xarici siyasət prioritetləri səhv formada təsvir olunur və Ermənistan riyakar üzünü yenidən göstərir. Hesab edirəm ki, Azərbaycana qarşı hərbi təxribatların miqyası genişlənərsə, bu Ermənistan dövlətçiliyi üçün böyük problemlərə çevriləcək və intihar formasını alacaq. Çünki Azərbaycan güclü dövlətdir, ərazi bütövlüyünü və suverenliyini təmin edib və hazırkı reallıqlarda Azərbaycana qarşı hər hansısa təxribat xarakterli addımlar və yaxud genişmiqyaslı xarakter alan təxribat cəhdləri Ermənistan dövləti üçün sonun başlanğıcı olacaqdır".
Zeynəb Mustafazadə
